Sarawak Meruan Dipilih Nyadi Palan Meranak Puku Taja Gaya Ekonomi Enda Tentu
KUCHING: Sarawak meruan dipilih nyadi palan meranak puku bepun ari disiplin fiskal, strategi kuasa enggau pengulih nengeri ti majak diserariska enggau ekonomi global ti enda tentu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ubah landskap ekonomi serantau enggau antarabansa begunaka chara pekara wang ti bejimat enti dibanding dua puluh taun dulu alai pemansang ekonomi entap agi ba rantau ASEAN.
Ku iya, Bajet Sarawak 2026 dilangkar bepelasarka perambu konservatif, ngira gaya global ti enda tentu sereta gaya pekara wang ti terit agi.
“Taja pia, Sarawak majak melaba bajet lebih. Tu mandangka pengawa ngatur pekara wang ti bisi disiplin, penatai pemisi ti macham penatai sereta rizab ti tegap,” ku iya.
Iya madah munyi nya maya ngenataika jaku pengelalu serimbai Program Bejadi Forum Dagang & Ekonomi ASEAN Sarawak (ASBEF) 2026 ditu, Hari Empat,
Nambah ke jaku iya, Datuk Patinggi Abang Zohari madah, penuduk fiskal ti entap nya ngulihka perintah nengeri nampung pengawa meranak puku strategik lalu enda ibuh nganti pemutus ba gaya ekonomi ti mar.
Ku iya nerang, agih belanja nya lebih agi dikena ba infrastruktur, kapasiti industri, sistem kuasa sereta digital.
Maya nya mega, Premier Sarawak bisi nyua Anugerah Penyulut Dagang ASEAN ngagai 14 penerima.
Dulu agi nerima basa nya Chairman Kaunsil Pemansang Ekonomi Sarawak (SEDC) Tan Sri Datuk Amar (Dr.) Abdul Aziz Husain ti nerima ASEAN Outstanding Business Leadership Lifetime Achievement Award, ditangkan penerima ungkup ASEAN Business Excellence Award, ASEAN Innovation Excellence Award, ASEAN Outstanding Entrepreneur Award, ASEAN CEO Icon Leadership, ASEAN Human Resource Leadership Award enggau ASEAN CEO Business Icon Leadership Award.
ASBEF 2026 diatur begulai enggau Kelab Ekonomi ASEAN (AEC), Institut Strategik KSI ungkup Asia Pasifik enggau Kelab Dagang ASEAN ti digulu urung 200 penyereta, nyengkaum penengkebang polisi, pegawai kanan perintah, tuai dagang, pemeranak puku enggau pakar industri ari selampur ASEAN enggau menua bukai.
Sama datai, Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom, Sapit Menteri Kuasa Enggau Pemeruan Rampa Menua Sarawak Datuk Dr. Hazland Abang Hipni, Chairman Kelab Ekonomi ASEAN enggau Presiden Institut Strategik KSI ungkup Asia Pasifik Tan Sri Michael Yeoh sereta Presiden Kelab Dagang ASEAN (ABC) ti mega Chairman Pansik enggau Advokasi CARI ASEAN enggau Chairman Institut Pansik Makit Modal Malaysia (ICMR) Tan Sri Dr. Munir Majid.-EDISI UKAS
Pemberita: Nur Nabilla
Gambar: Ibanez Jeffery Guang
