KUCHING: Media di Sarawak patut ngenegap pengawa nyadi bakih strategik pemansang nengeri ti ngenatai berita lurus sereta nemban, lebih agi maya napi pemar jeman digital ti majak kompleks sereta deras.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Profesor Dr. Sim Kui Hian madah, media maya tu udah berubah laban tiap iku orang ulih nabur berita nengah telefon pintar enggau media rama.

“Diatu semua orang ngumbai diri sida pengemeran media. Enggau telefon aja ulih ngaga macham pekara, bisi sekeda nabur penerang ti salah, enda chukup penerang lalu bisi landik amat bepolitik nyentuk pekara manah nyadi jai,” ku iya.

Iya madah munyi nya maya bejaku ba Program Makai Lemai Begulai Enggau Media serimbai Taun Baru China 2026 ditu, Hari Empat.

Taja pia, ku iya, media tauka pemberita ti professional meruan besai reti nyadi chunto ti manah ngagai rayat sereta patut nentu berita ti digaga lurus sereta nemban.

Datuk Amar Profesor Dr. Sim madah, berita ti positif ukai tuju muji orang tang nentu pengawa ngenatai penerang ti komprehensif sereta nemban ngagai rayat.

Ku iya, pengemeran media dipinta ngemeran chara professional nengah madah pekara ti betul bekaul siti-siti pekara ngambi rayat bulih penemu ti betul.

Kelimpah ari nya, pengemeran media dipinta mantu narak naratif positif ungkup pemansang Sarawak dudi hari.

Sama datai, Kaban Kunsil Nengeri (ADUN) Batu Kitang Dato Ir. Lo Khere Chiang, ADUN Kota Sentosa Wilfred Yap Yau Sin, Datuk Bandar Kaunsil Mengeri Kuching Selatan (MBKS) Dato Wee Hong Seng, pengemeran media sereta temuai dipebasa ke bukai.-EDISI UKAS

Pemberita: Nur Nabilla
Gambar: Ameerul Syafiq Khir