Sapit Sekretari Perintah Sarawak (Operasyen), Datu Hii Chang Kee madah, pengawa ngatur sebana rayat ukai semina proses nisih sereta timbal tang proses nyaga pengandal rayat.
Ku iya, Talikhidmat siti pelasar mandangka sistem perintah nya lurus.
“Timbal ti jampat tang enda mutar isu enda chukup lalu timbal ti ngena tang nadai pengasih pan enda chukup.
“Kitai patut ingat, penyiru enti nadai diadu semina pengasih tang penyiru ti disereta enggau pengeransing ngiga chara mutar, nya mih servis perintah ke bendar.
“Rakyat enda semina deka didinga, sida deka pengeransing kitai mutar lalu sida mega deka meda sistem tu responsif, ukai defensif dikena sida berasai didinga,” ku iya.
Iya madah munyi nya maya bejaku ba Woksyop Atur Talikhidmat Agensi 2026, ditu, Hari Empat.
Bisi 255 iku pengatur Talikhidmat agensi udah ngulu woksyop nya dikena ngentapka pengawa ngatur sebana ti bisi kualiti lalu diputar ba timpuh ke ditetap.
Bekaul data taun dulu, Datu Hii madah, sistem Talikhidmat udah nerima 71,972 timbal sereta 71,958 udah diputar agensi.
“Agi bisi 14 timbal ba sistem Talikhidmat ke bedau diputar agensi lalu aku minta agensi ke bedau mutar sebana rayat nya ngambi mutar lengkas,” ku iya baru.
Sama datai, pengajar sistem Talikhidmat ari World Communications iya nya Jaffri Amin Osman enggau Annelizia Zainal. -EDISI UKAS
