MATU: Tiga projek ngaga enggau nyeruri sekula beungkus manggai RM100 juta benung diadu ba sitak Kunsil Nengeri (DUN) Jemoreng dikena negap fasiliti pelajar menua pesisir.

Sapit Menteri ba Opis Premier Sarawak (Integriti enggau Ombudsman) ti mega Kaban Kunsil Nengeri (ADUN) Jemoreng Datuk Dr Juanda Jaya madah, projek nya dipejalai nentuka nembiak ngasai palan belajar ti lantang enggau likun agi.

“Ungkup projek ba SK Pergau, tu disadang ulih ditampung manah taja napi penanggul laun urung lima peratus tang aku andal ke pekara nya ulih diputar ba timpuh enda lama da,” ku iya lebuh dirandau pemberita pengudah ngatur pejalai ngabas seraya gawa ba SK Bawang Tian, kena Hari Lima.

Iya mega ngabas SMK Matu ti diatu lanchar sebedau ngabas pejalai projek ba SK Bawang Tian ti diatu tembu manggai 80 peratus lalu disadang tembu manggai ujung taun tu.

Datuk Dr Juanda nyemetak madah, pengawa terus matau ari raban Opis Pemansang Nengeri (SDO), begulai enggau Opis Kereja Raya (JKR) Sarawak beguna amat nentuka genap projek lanchar nitih taga enggau nitih ke spesifikasyen ditetap.

Kelimpah ari nya, iya meri terima kasih ngagai Perintah Sarawak enggau Perintah Besai laban udah nanggam kerejasama rat dikena ngemujur projek nya ke pengelantang enggau pemansang rebak dudi ba endur nya. - EDISI UKAS