Menteri Industri Pemakai, Komoditi enggau Pemansang Kandang Menua Sarawak Dato Sri Dr. Stephen Rundi Utom madah, taun keterubah RMK-13 nya renggat kritikal nentuka Opis Betanam Betupi nyapai pemutus ti ulih disukat sereta nyamin pengelikun bekal pemakai nengeri.
“Sektor agropemakai diatu nambah urung 10 peratus ngagai Pemansut Kasar Dalam Menua (KDNK) nengeri, sama enggau manggai RM50 bilion setaun, tang pengulih nya apin dikena penuh.
“Genap bagi menua meseti bisi pelin nyata enggau atur enggau selinting ti disukat,” ku iya ba Pengerami Anugerah Servis Nyulut Taun 2026 Opis Betanam Betupi Sarawak, ditu kena Hari Lima.
Iya nyemetak madah, inisiatif ngelama tu enda chukup berindik ari pemar pengelikun pemakai diatu chara global lalu begunaka atur proaktif sereta akauntabiliti tuai.
Ku Dato Sri Dr. Stephen Rundi, Sarawak nyelinting eksport abis nadai 450,000 tan metrik produk betanam betupi setaun manggai 2030 sereta ngasilka 25 peratus jelu tupi kediri empu.
“Timpuh Januari nyentuk March beguna amat ngatur program betanam betupi nentuka inisiatif enda dikeruga musin pengerami lalu genap program diberi perati enggau dipatau manah,” ku iya.
Ngenang pemar rebak dudi, iya madah ke majoriti pekebun ba Sarawak diatu dikemujur sida ti beumur 70 nyentuk 80 taun seraya peratus rebak biak ngambi bagi ba pengawa tu agi baruh.
Berebak enggau nya, dikena matak minat rebak biak, bisi 60 nembiak deka dianjung ke Australia ngambi belajar chara betanam betupi moden sereta ngerembai mekanisasyen, betanam betupi ti betul, akuakultur enggau teknologi pintar dikena ngubah peragam sida bekaul pengawa betanam betupi ti ngelama tu disebut pengawa ti kamah enggau bisi risiko.
Iya mega nyemetak madah ke pemesai guna pengami tanah, topografi enggau akses ai ba pemansang betanam betupi strategik ke alai urung 14,000 nyentuk 15,000 hektar udah dikelala ungkup tuju nya.
“Dikena nambah semekih, perati mega diberi ngagai komoditi besai baka inyak, nanas, rian, dabai, jelu tupi enggau akuakultur kelimpah ngemanah atur data, rega tambah produk enggau makit dikena negap rentayan bekal,” ku iya.
Dato Sri Dr Stephen Rundi nyemetak madah, taja lebih 70 program diatur opis nya tang sida tetap ngemerat penemban atur enggau empas nyata ngagai komuniti menua pesisir.
“Nadai utai ti enda ulih dikereja enti kitai ransing gawa, berunding ngelui ari utai ngelama tu enggau ngesan tanggungpengawa ngena disiplin,” ku iya seraya ngelalau genap agih belanja RMK-13 dikena manah nentuka Sarawak nyadi tibang pemakai ti besemekih ba renggat global.-EDISI UKAS
