Pengerami nya dipenyadi Kaban Kunsil Nengeri (ADUN) Tebedu, Dr Simon Sinang Bada, ti ngari ke Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah.

Lebuh bejaku, Dr Simon ngelalau komuniti kelebih agi komuniti Bidayuh ngambi terus nyaga enggau ngetan pesaka budaya nyadi lambang identiti enggau dikemegah begulai.

“Tradisyen tu pesaka asal aki ini kitai kelia ti mandangka pengarap enggau pemereti ati komuniti kitai. Nyema enda dijaga, rebak dudi engka lenyau identiti budaya sida,” ku iya.

Iya mega madah ke program Ngiradan Ngirumang diatu udah dipasuk dalam kalinda Opis Menteri Dagang Temuai Sarawak lalu mandangka komitmen perintah nyagu budaya lokal ngagai tikas ti tinggi agi sereta bisi pengulih nyadi produk dagang temuai budaya.

Kelimpah ngemerat pemesai guna kerejasama serap komuniti nentuka tradisyen ditampung, iya mega nyebut sukut pemansang ekonomi nengah bejalaika inisiatif “Harp Economy”.

Ku iya, sepenyampau RM46 juta udah diagih dikena ngemujur projek nya dikena ngerandang peluang dagang kelebih agi ngagai raban indu ba sitak Tebedu.

Iya mega madah, pengawa ngempu tanah sereta bayar bekaul deka dipejalai enda lama da.

“Projek tu dikeandal ulih ngubah tikas sosioekonomi peranak lokal sereta ngentapka penuduk ekonomi komuniti menua pesisir,” terang iya.

Dr Simon mega meri terima kasih ngagai tuai lokal, agensi perintah sereta semua komuniti ti meri kerejasama rat ngemujur program main asal sereta inisiatif pemansang ba sitak Tebedu.

Pengerami nya mega digulu Residen Bagi Menua Serian Caroline Cleophas Joseph, Tuai Polis Pelilih Serian Superintendan Freddy Bian Stanilaus, Pegawai PelilihTebedu Gerald George Entigar, Chairman Kaunsil Pelilih Serian Dato’ Peter Minos sereta pengari ari Kalimantan Barat, Indonesia iya nya Camat Kecamatan Sekayam Supriadi Simarmata enggau Camat Kecamatan Entikong Yulius Eka Suhendra nyadi lambang kaul rat komuniti serantau.-EDISI UKAS