Program nya dipenyadi Sapit Menteri Dagang Antarabansa, Industri enggau Pengawa Meranak Puku Sarawak ti mega Kaban Kunsil Nengeri (ADUN) Batang Ai, Datuk Malcolm Mussen Lamoh.

Ba randau nya, Tuai Rumah Edat Intan meri terima kasih laban udah ngagihka belanja enggau bantu sebedau tu seraya mantai sekeda peminta baru dikena nyaga pengelantang peranak rumah panjai.

Entara peminta ti dibantai nyengkaum peminta masang tile ba ruai rumah panjai, ngaga stor nyimpan barang sereta belanja dikena nyukung aktiviti enggau nyaga pengelantang indu nengah Gerempung Indu.

Bejaku ba pengerami nya, Datuk Malcolm nyemetak madah ke tuai ba renggat baruh, kelebih agi Tuai Raban Bansa enggau Tuai Komuniti (KMKK), meseti bepelasarka prinsip integriti enggau akauntabiliti seraris enggau Ordinan Ketua Masyarakat dan Ketua Kaum 2004.

Iya mega nerang pejalai projek Klinik Lubok Antu lalu ngarap projek nya ulih digaga nitih taga ke pemaik rayat.

Pia mega, projek bekal ai beresi beungkus RM117 juta benung diadu nyengkaum inisiatif“New Water” dikena ngerembai bungkur bekal ai beresi.

Sepenyampau 250 tangki ai mega dikemendar ungkup Tuai Ruang Bilik ti apin nerima bekal ai beresi.

Kelai sukung meruan ngagai pemansang komuniti, iya mega ngemendar agih belanja Projek Mit Pemansang Menua Pesisir (MRP) mungkur RM15,000 ngagai JKKK Lubok Subong, RM5,000 ngagai Gerempung Indu Lubok Subong sereta RM10,000 bela ungkup Serubah Ulu, Serubah Ili, Ng Kesit Ili enggau Ng Kesit Ulu.

Bela nerima RM10,000 iya nya PIBG SK Ng Kesit enggau Kelab Rekreasyen Klinik Nanga Kesit.

Randau nya mandangka inisiatif perintah datai ngundang nentuka sada rayat terus didinga sereta pemansang menua pesisir dipejalai chara inklusif.

Sama datai iya nya Pegawai Pelilih Lubok Antu, Akoi Ejau, Kaban Kaunsil Pelilih Lubok Antu (MDLA) sereta KMKK Pelilih Lubok Antu.-EDISI UKAS