KUCHING: Sarawak mereti ke reti pengering enggau peneguh ti dipandang Taun Kuda ba pengerami ngintu Taun Baru China kelebih agi napi pemar global ti majak kompleks.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, dunya diatu napi mayuh penanggul nyengkaum penyarut geopolitik, keruga teknologi baru baka Artificial Intellegence (AI) sereta ngalih ngagai ekonomi baruh karbon dikena mutar ubah klimet.

“Pekara tu beguna amat ngambi kitai terus nyingkang ngagai jeman ti mayuh pemar,” ku iya nengah pesan Taun Baru China 2026, kena Hari Minggu.

Taja napi pemar global, Sarawak terus mandangka ekonomi ti entap asil polisi pemansang ti nyengala sereta strategik perintah nengeri diiring Gabungan Parti Sarawak (GPS), kelimpah sukung rat rayat pupu bansa.

Ari sukut pemujur ekonomi, iya madah ke Pemansut Kasar Dalam Menua (GDP) Sarawak dipelaba manggai RM154 bilion ba taun 2025 enggau tumbuh entara lima nyentuk enam peratus, baka dibantai dalam Bajet 2026 ba Kunsil Nengeri.

“Penyampau tu nambah ngenyit enti dibanding penyampau ba taun 2024.

“Bepelasarka data ari Opis Perangkaan Malaysia, ekonomi Sarawak mansang ba tikas 3.9 peratus ba taun 2024, enggau GDP sepenyampau RM148.2 bilion,” ku iya baru

Sektor minyak enggau gas, kilang bepelasarka pemansut sereta pengawa betanam betupi komoditi baka minyak sawit enggau lada mengkang nyadi penyungkak besai ekonomi nengeri.

Tang, iya nyemetak madah ke pemansang deras ba sektor kilang teknologi tinggi enggau industri gadung nyadi pemujur ti chukup ngemegah seraya mandangka pemujur inisiatif transfomasyen ekonomi Sarawak nuju pemansang ti meruan agi. - EDISI UKAS