KUCHING: Pengerami Ngintu Taun Baru China ba Sarawak ukai semina pengerami sesebengkah raban bansa tang mega nyadi lambang penyerakup enggau begulai semua rayat ba nengeri tu.

Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Profesor Dr Sim Kui Hian madah, pengerami ngelalu pengabang ti nyadi tradisyen komuniti ba nengeri tu mandangka pengelantang ti pengelebih dikembuan rayat pupu bansa enggau jalai pengarap lebuh semua datai begulai berami.

“Taun Baru China ba Sarawak nya ungkup semua. Tu mih pengelebih kitai nyadi rayat ti semampai idup lantang enggau bela bebasa ke pangan diri,” ku iya nengah pesan Taun Baru China 2026.

Ku iya, pengerami nya ukai semina nyadi peluang betemu enggau diri sebilik enggau ngerapit kaul tang mega awak ungkup rayat berati ke pemujur ti udah diulih sereta merambu chara ngemujur pemansang nengeri.

Nambah ke nya, iya mai semua Anak Sarawak, sekali ke dalam nengeri ba Semenanjung Malaysia tauka ba menua luar ngambi terus besaup nyungkak pemansang Sarawak.

“Lebuh kitai pulai ke menua, aram kitai berati baru pengawa ti ulih dikereja kitai ungkup Sarawak,” terang iya.

Manggai taun 2030, iya nyemetak madah ke Sarawak begunaka semangat begulai dikena nentuka agenda pemansang enggau nempa bansa ulih dikemujur.

Ku iya, semangat pengerami ti ngempung rayat patut dibantai nengah ngemansang nengeri ngambi Sarawak terus maju ukai semina ari sukut ekonomi, tang mega tegap ari sukut penyerakup sereta pemereti ati rayat.

Serimbai Taun Kuda Api 2026, iya ngelalau rayat narak semangat berani, liat ati enggau ransing napi pemar kemaya hari.

Berebak enggau nya, iya ngingatka mensia mayuh semampai ngemerat pengelikun ba rantau jalai pulai ke menua sereta ngena awak bekualiti begulai enggau diri sebilik ti dikesayau.

Nya alai, iya besampika semua rayat gerai ngambi ulih terus ransing gawa ungkup diri sebilik, komuniti enggau nengeri. –EDISI UKAS