KUCHING: Perintah Sarawak keran terus negap pemansang main bol dikena nempa mayuh agi anak Sarawak nyadi pemain professional.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg madah, sukung semampai diberi dikena ngatur liga enggau pekit ba renggat nengeri ti nyadi pelasar pemadu engkeman ngansah penau biak Sarawak.

Ku iya, Liga Premier Sarawak ti diatur nyadi nalan nempa ekosistem main bol ti berurun enggau kompetitif agi.

“Liga tu deka terus disukung laban kitai deka meda mayuh agi penau anak Sarawak nyadi pemain bol profesional dudi hari,” ku iya lebuh ngemata pekit kepenudi Piala Premier Sarawak di Stadium Negeri, ditu kena Hari Minggu.

Ba pekit kepenudi edisyen keterubah nya, Bintulu FA nempa pemujur pengudah ngalahka Samarahan FA 3-1.

Kelimpah ari nya, iya mega meri tabi puji ngagai Kuching City FC laban mujur ngagai semifinal Piala Malaysia pengudah ngalahka DPMM FC, lalu madangka penau tim ari Sarawak bepekit ba panggau nasional.

Nangkan nya, Presiden Gerempung Main Bol Sarawak (FAS), Datuk Fazzrudin Abdul Rahman madah ke pekit ti belabuh diatur September 2025 nya ngempuru 13 tim, iya nya enam tim ari Zon Utara enggau tujuh ari Zon Selatan.

Iya madah, perintah nengeri keran nyungkak pemansang lumba kelebih agi main bol ti dipeda ulih nyadi penyungkak nempa penau baru, seraya nyagu nama Sarawak ba panggau main bol menua. — EDISI UKAS

Pemberita: Jonnie Kiew
Gambar: Pejabat Premier Sarawak