KUCHING: Bintulu FA nyadi champion Piala Premier Sarawak edisyen keterubah pengudah ngalahka Samarahan FA 3-1 ba renggat kepenudi ti diatur ba Stadium Negeri Sarawak, kena Hari Minggu.

Ba idar keterubah, Samarahan FA lebih agi nyulut tang puntan ngalahka pemain Bintulu FA taja berapa kali nguji.

Gaya bemain berubah ngenyit ba 'first half' lebuh pemain Samarahan FA, Khairul Jemi, diberi kad mirah pengudah kasar enggau pemain bukai ngujungka 10 pemain aja bemain.

Tama idar kedua, Bintulu FA ngena peluang mayuh agi pemain.

Asil iya, pemain tengah sida, Badrul Hafiz, mujur masuk ke gol ba minit ke-53.

Empat minit udah nya, gintir Shahmir Izat Sinang nambah gol, 2-0.

Taja bemain kurang siku pemain, Samarahan FA enda mudah alah lalu mujur masuk ke gol ba minit ke-65 nengah Muhd Zarif Razali.

Tang, penyikar Mohd Haisal Yusof ba minit ke-74 nentuka Bintulu FA ngempu gela champion.

Enggau nya, Bintulu FA mai pulai trofi Piala Premier Sarawak, midul sereta perais mata duit RM50,000 lalu Samarahan FA ti bulih lumur dua nerima trofi, midul enggau mata duit RM30,000. -EDISI UKAS