Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar madah, mayuh bantu enggau sukung disedia kelebih agi ba pekara pelajar, rama enggau pengelantang nentuka komuniti China bela ngasai pemansang.
Ku iya, ba taun 2024, Perintah Sarawak diiring Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah ngagihka urung RM22 juta ngagai sekula China nyerangkung RM12 juta ungkup Sekula Primari Bantu China enggau RM10 juta ungkup Sekula Sekondari Bantu China.
"Belanja tu mega nambah ari RM9 juta ngagai RM12 juta ungkup sekula primari dibanding taun ti udah lalu nyadi inisiatif Perintah Sarawak nyukung pemansang penau nembiak enggau negap pelajar.
“Bantu tu sebagi ari inisiatif Perintah Sarawak dikena ngemansang modal mensia bepengelandik enggau ngangkatka Sarawak nyadi nengeri mansang manggai 2030," ku iya.
Iya madah munyi nya nengah pesan khas serimbai Pengerami Ngintu Taun Baru China 2026.
Tun Pehin Sri Dr. Wan Junaidi madah, Perintah Sarawak terus ngaku Sijil Peperiksaan Bersepadu (UEC) nentuka nembiak sekula China nampung pelajar ba universiti enggi Sarawak, nyengkaum ba bidang strategik baka teknologi satelit enggau aeroangkasa enggau pelajar ba universiti enggau pelajar tinggi Sarawak ti diberi pechuma taun tu.
Ba pekara ngintu pengelantang, iya madah ke perintah nengeri mega ngatur Program Sejambak Kasih Taun Baru China chara konsisten dikena ngelempung tating belanja ruang bilik kurang penatai pemisi.
Pia mega, iya madah ke bantu belanja ninting bulan ari Opis Pengelantang Komuniti (JKM) sereta agih belanja Unit Pekara Pengarap Bukai (UNIFOR) dikena nyeruri infrastruktur enggau ngaga rumah sembiang enggau tepikong China ba selampur Sarawak mega ditampung.
Nambah ke nya, Yang di-Pertua Negeri Sarawak nyemetak madah ke komuniti China udah lama nyaup pemansang Sarawak kelebih agi ba bidang ekonomi enggau dagang.
Ku iya, komuniti nya udah nyadi tulang belakang ba mayuh sektor ekonomi Sarawak nyengkaum dagang, pengawa betanam betupi komersil, dagang moden, dagang mit enggau jelan pemesai (PKS) sereta pengawa meranak puku.
Kelimpah ari ekonomi, iya madah ke komuniti China mega ngesan pangku pengawa ti signifikan ba politik, pelajar enggau rama ti nyadi kebuah besai pemansang Sarawak nyadi siti kandang menua ti progresif enggau lantang.
Iya mega ngelalau semua rayat Sarawak bela besuap ngemujur pemansang nengeri.
"Aram kitai begulai nyukung inisiatif perintah ngemujur agenda pemansang enggau nyungkak ekonomi kandang menua Sarawak ke pengelantang rebak dudi.
"Lalu aram mih kitai terus nyaga enggau mekuh semangat begulai enggau beserakup ke pemansang begulai," ku iya madah baru.-EDISI UKAS
