Program Genturung Pendiau Iru MADANI Negap Agenda Pemansang Menua Pesisir Ba Baleh
BALEH: Program Genturung Pendiau Iru MADANI terus ditegap nengah pejalai ngabas taba enggau ngenuku skop kereja ti diatur ba Rumah Melintang, Sungai Sebiro, Gaat, Bukit Mabong, ditu kena Hari Enam.
Program diatur Palan Servis Komuniti P.216 Ulu Rajang nya udah digulu Kaban Parlimen Hulu Rajang ti mega Sapit Menteri Digital, Datuk Wilson Ugak Kumbong.
Tuju pejalai nya dikena ngabas sereta mending peminta peranak seraya ngenuku pengawa ti deka dipejalai nengah inisiatif Genturung Pendiau Iru MADANI lalu mandangka pengeransing perintah nentuka genap perambu pemansang dilanggur nitih ke pekara ti diguna.
Program nya bela nyadi pelasar beguna dikena ngerapit kaul entara perintah enggau rayat kelimpah nentuka pejalai inisiatif pemansang ulih dikenatai nyentuk ba rayat mayuh, kelebih agi ba menua ulu baka Baleh.
