Kerejasama Strategik UKAS–PPS Meri Penemu Ngagai Penguna Ba Sarawak
KUCHING: Unit Komunikasi Awam Sarawak (UKAS) nerima penemuai basa deligit Gerempung Penguna Sarawak (PPS) ba Indu Opis UKAS ditu, kena Hari Satu.
Direktor UKAS, Awang Putrayusrie Awang Redzuan ngambat penatai deligit PPS ti diulu ke Presiden PPS, Dr. Wynson Ong enggau tuju negap kerejasama strategik ke pemaik enggau nyaga hak penguna ba nengeri tu.
Ba randau nya, Dr. Wynson nerang ke penumbuh PPS kelimpah nerang ke tuju, visyen sereta pengawa nyaga hak enggau pemaik penguna.
Ku iya, entara batang pengawa PPS iya nya nyendia servis sanding penemu, nyeridi komuniti bekaul hak enggau tanggungpengawa nyadi penguna sereta nyadi pelasar komunikasyen entara penguna enggau raban bekuasa.
Iya mega nerang ke sekeda perambu ti patut dikemanah nyengkaum ngerembai program meri penemu, ngatur seminar pelajar sereta bejalaika inisiatif tanggungpengawa rama korporat (CSR) ti meri pemaik terus ngagai komuniti.
Pia mega, randau nya nyadi pelasar nanggam kerejasama strategik begulai enggau UKAS nyengkaum ngena 'talikhidmat' UKAS nyadi platform rasmi ngenataika sebana tauka isu bekaul penguna.
Randau tu dikeandal nyadi pemungkal ngatur mayuh agi program kerejasama ti ulih narak penemu bekaul penguna nipak juluk ati perintah nengeri nempa komuniti ti pintar nyadi penguna.
Sama datai, Sapit Direktor UKAS, Mohamed Faizal Shah sereta bala pegawai kanan UKAS. -EDISI UKAS
