KUCHING: Pengerami ngelalu pengabang diatur Perintah Sarawak terus nyadi pelasar besai mekuh penyerakup sereta nempa pemereti ati rayat nengeri tu.

Sapit Premier Sarawak Datuk Amar Profesor Dr. Sim Kui Hian madah, Pengerami Ngelalu Pengabang Taun Baru China, Hari Raya enggau Gawai renggat nengeri mandangka komitmen perintah ngagai prinsip inklusiviti ti nyadi pugu peneguh Sarawak.

“Tu mih Sarawak, kitai ulih meda orang tuai enggau biak, China, Iban sereta Melayu sama datai. Mayuh datai ngerasuk pekayan asal sida lalu tu mih pengelebih Sarawak.

“Pengerami ngelalu pengabang mai reti semua dikelalu datai,” ku iya.

Iya madah munyi nya ba Pengerami Ngelalu Pengabang Taun Baru China Renggat Sarawak ba Palan Konvensyen Borneo Kuching (BCCK) ditu, kena Hari Dua.

Bela datai ngerichah pengerami iya nya Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi.
Datuk Amar Profesor Dr. Sim mega madah, budaya nya pugu nempa pemansang Sarawak ke alai rayat begulai nadai ngira tirai juru nentuka nengeri tu nyadi palan ti manah agi.

Ku iya, Sarawak nyadi chunto baka ni komuniti ulih maju begulai nengah pengelantang lebuh mayuh endur ba dunya majak pambar.

Ngenang pengerami ngelalu pengabang nya, iya ngadang urung 5,000 pengusung datai bepelasarka rikod taun ti dulu lalu penyampau nya engka nambah berindik ari gaya hari ti manah.

Sama datai iya nya Sapit Menteri Besai Datuk Amar Fadillah Yusof begulai enggau bini Datin Amar Ruziah Mohd Tahir, Sapit Premier Sarawak iya nya Datuk Amar Douglas Uggah begulai enggau bini, Datin Amar Doreen Mayang, Sekretari Perintah Sarawak Datuk Amar Mohamad Abu Bakar Marzuki begulai enggau bini Datin Amar Baduyah Bujang, bala Sapit Menteri Perintah Sarawak sereta tuai opis. - EDISI UKAS

Pemberita : Nur Nabilla
Gambar : Ibanez Jeffery Guang & George S. Embie