KUCHING: Pengerami Ngintu Taun Baru China ba Sarawak terus mandangka pengelantang enggau penyerakup komuniti pupu bansa sereta pengarap ba nengeri tu.

Menteri Penyerakup Bansa, Dato Sri Aaron Ago Dagang ti mega Kaban Parlimen Kanowit madah, pengawa ngatur pengerami baka nya nyendia peluang berandau enggau integrasyen entara komuniti.

“Sehari tu chukup nyelai ba Sarawak. Tiap bisi pengerami baka tu diatur, kitai ulih meda mayuh etnik ngambi bagi,” ku iya.

Iya madah munyi nya lebuh dirandau pemberita ba Pengerami Ngelalu Pengabang Taun Baru China 2026 Renggat Sarawak ba Palan Konvensyen Borneo Kuching (BCCK) ditu, kena Hari Dua.

Bela datai ngerichah pengerami iya nya Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar begulai enggau bini, Toh Puan Datuk Patinggi Fauziah Mohd Sanusi.

Ku Dato Sri Aaron Ago, pengerami nya nya nipak juluk Opis Menteri Penyerakup Bansa nyendia pelasar ti ngempuru komuniti enggau lantang.

“Ba Sarawak, aku meda pengerami tu chukup richah diintu semua komuniti. Nadai ngira raban bansa enggau pengarap,” ku iya agi.

Sama datai ba pengerami ngelalu pengabang iya nya Sapit Menteri Besai, Datuk Amar Fadillah Yusof begulai enggau bini Datin Amar Ruziah Mohd Tahir, dua Sapit Premier Sarawak iya nya Datuk Amar Douglas Uggah begulai enggau bini, Datin Amar Doreen Mayang enggau Datuk Amar Profesor Dr. Sim Kui Hian begulai enggau bini, Datin Amar Enn Ong Siok Ean, bala Menteri Kabinet Perintah Sarawak, Sekretari Perintah Sarawak Datuk Amar Mohamad Abu Bakar Marzuki begulai enggau bini, Datin Amar Baduyah Bujang, bala Sapit Menteri Perintah Sarawak sereta tuai opis. - EDISI UKAS

Pemberita : Nur Nabilla
Gambar : Nur Nabilla, Ibanez Jeffery Guang & George S. Embie