SADONG JAYA: Kaban Parlimen Batang Sadong, Rodiyah Sapiee ngabas operasyen ngiga enggau nyelamat (SAR) orang ditagup baya ba Jematan Batang Sadong.

Orang ti ditagup baya benama Mohd Faizal Abdillah, 29, asal ari Kampung Rangawan, Sadong Jaya diripotka ditagup baya semak Jematan Batang Sadong urung pukul 11 pagi, kena Hari Dua.

Nitih penerang tumu, ai benung surut lalu lelaki begulai enggau siku bakih iya bedarat semak jematan nya deka ngiga undang ngena jala sebedau ngenyit ditagup enggau ditaban jelu ai nya.

Operasyen SAR lengkas dipejalai ngaul mayuh agensi nyengkaum Opis Pelilih Mit Sadong Jaya, Polis Diraja Malaysia (PDRM), Raban Bomba enggau Penyah Penusah, Raban Penyangga Orang Periman Malaysia (APM), RELA sereta Sarawak Forestry Corporation (SFC).
Rodiyah mega ngena peluang nya betemu enggau sida orang ti ditagup baya sebilik ngambi meri sukung moral.

Iya mega minta SFC ngatur program meri pengeleda ba endur bisi risiko ngambi meri penerang ngagai peranak genturung pendiau sereta Gerempung Orang Berikan bekaul keruga baya enggau atur pengelikun ti meseti dititih.

Naka diatu, Palan Servis ADUN N25 Simunjan mega nganjung bantu pemakai enggau ai irup ungkup raban SAR sepanjai operasyen dipejalai.

Taja pia, lelaki ti ditagup baya apin ditemu lalu operasyen SAR deka ditampung sehari tu.

Sama datai, Pegawai Khas Kaban Kunsil Nengeri (ADUN) Simunjan, Rafendy Ariffin. -EDISI UKAS