LIMBANG: Pengelantang entara raban bansa terus nyadi pugu beguna nempa siti menua bansa ti tegap enggau maju kelebih agi ba konteks rayat mayuh ke alai semangat bebasa ke pangan diri sereta ngerami bemacham budaya enggau pengerami mandangka penuai runding rayat nyaga penyerakup.

Sapit Menteri Pengangkut Malaysia ti mega Kaban Parlimen Limbang, Datuk Hasbi Habibollah ,adah, ninting taun rayat Malaysia ngintu mayuh pengawa enggau pengerami genap raban bansa begulai nyadi lambang penyerakup ti teguh.

“Ninting taun kitai begulai ngintu mayuh pengerami genap raban bansa.

“Tu mih penyerakup dikembuan rayat Malaysia ke alai penyerakup nyadi pugu besai nempa menua bansa lalu entara kelai menua kitai maju iya nya berindik ari penyerakup ti ditanggam enggau dikembuan kitai sehari tu,” ku iya.

Iya madah munyi nya lebuh dirandau pemberita lebuh ngabang Taun Baru China begulai enggau Tuai Komuniti sereta Tuai Raban Bansa Tionghua Pelilih Limbang kena Hari Dua.

Ku iya agi, pengawa ngabang ba genap pengerami ukai semina ngerapit kaul tang mega kelai nyata peneguh sesebengkah menua bepanggai ba rayat ti seati enggau beserakup.

Serimbai Taun Kuda tu, Datuk Hasbi ngarap pengerami nya mai pemaik enggau peneguh ngagai semua rayat nadai ngira raban bansa enggau pengarap.

“Serimbai Taun Kuda tu, kitai ngarap pemaik enggau peneguh ungkup rayat. Kitai meseti sama nyaga pengelantang nentuka penyerakup ti ditanggam diatu terus ditan enggau ditegap,” ku iya baru.

Sama datai, Kaban Kunsil Nengeri (ADUN) Batu Danau, Dato Paulus Palu Gumbang enggau Chairman Kaunsil Pelilih Limbang, Sufian Mohat. -EDISI UKAS