DARO: Kaban Parlimen Igan, Ahmad Johnie Zawawi ngatur pejalai ngabang ngagai rumah komuniti Tionghua ba Pasar Daro serimbai Taun Baru China 2026.
Program diatur Palan Servis Parlimen Igan kena Hari Dua ti digulu urung 50 peranak lokal nya nyadi pelasar negap kaul entara tuai enggau komuniti enggau lantang.
Ba pejalai ngabang nya, iya betemu seraya berandau enggau peranak kelimpah meri “Gong Xi Fa Cai” ngagai komuniti Tionghua ti ngerami pengerami nya kelebih agi ba sitak Parlimen Igan.
Ku Ahmad Johnie, pejalai ngabang serimbai pengerami pupu bansa nya tradisyen beguna negap penyerakup enggau bebatak asur entara rayat mayuh ba Sarawak.
“Pengerami baka tu ukai semina dirami nyadi tradisyen budaya tang mega nyadi pelasar meransang semangat begulai, bebasa enggau mereti ke pangan diri,” ku iya.
Iya mega meri terima kasih ke pemanah sambut komuniti lokal sereta ngarap Taun Baru China sekali tu mai pengelantang enggau pengaga ngagai semua rayat.
Pengawa ngabang nya mandangka komitmen tuai Parlimen Igan nentuka kaul rat entara tuai enggau komuniti terus ditegap enggau dijaga nipak juluk pemansang inklusif enggau pengelantang begulai. - EDISI UKAS
