SPAOH: Pengawa ngabang serimbai pengerami besai pupu bansa nya tradisyen ninting taun ti nyadi pugu pengelantang komuniti Sarawak.

Sapit Premier Sarawak, Datuk Amar Douglas Uggah Embas madah, pengerami ukai semina dirami sesebengkah raban bansa tang dirami begulai semua rayat Sarawak lalu pelasar beguna narak semangat bebaik.

“Lebuh bisi pengerami sekali ke Taun Baru China, Gawai Dayak tauka Hari Raya, kitai deka ngabang enggau pangan diri nyadi chara negap kerejasama, bebaik enggau kaul ti rat.

“Kitai mega ngulihka timbal bekaul pekara ti nyadi sereta mereti ke utai ti diguna ba endur nya,” ku iya lebuh dirandau pemberita maya ngabang Taun Baru China ngagai sekeda rumah Tuai Raban Bansa enggau Tuai Komuniti China ngelingi Pasar Spaoh, kena Hari Tiga.

Pengawa ngabang nya, ku iya, mandangka semangat penyerakup enggau pengelantang pupu bansa ba Spaoh nipak juluk perintah nengeri ngambi terus negap pengelantang sosial enggau pemansang inklusif ba Sarawak.

Iya mega meri “Gong Xi Fa Cai” enggau“Xin Nian Kuai Le” ngagai komuniti China ti ngintu Taun Baru China enggau pengadang taun baru mai mayuh agi pemansang, pengelantang enggau pengaga.

Pejalai ngabang diatur Palan Servis DUN Bukit Saban nya diatur ari pukul 11.30 pagi nyentuk 3.30 lemai lalu ngabang ngagai enam rumah nyengkaum rumah Pemancha Goh Leng Thong, Kaunselor Lai Ngit Shin enggau Kapitan Jong Koi Chian.

Datuk Amar Douglas Uggah ti mega Menteri Infrastruktur enggau Pemansang Penyangkai Kapal Sarawak ti nyadi ADUN Bukit Saban datai begulai enggau bini, Datin Amar Datuk Doreen Mayang.

Bela nyempulang iya nya Kaban Parlimen Betong, Datuk Dr Richard Rapu, sereta sekeda tuai enggau pegawai. - EDISI UKAS