Sapit Menteri Dagang Antarabansa, Industri enggau Pemeranak Puku Sarawak, Datuk Dr Malcolm Mussen Lamoh madah, pemansang ukai semina ba ekonomi aja tang bela bekaul pekara rama enggau pelajar.
Iya bejaku munyi nya maya ngabang Taun Baru China di Kampung Hulu ditu, Hari Lima.
Penatai iya ngabang maya nya enda semina dipeda ngerichah Taun Baru China aja tang nyadi pelasar dikena ngenegap kaul tuai enggau rayat.
Iya ke mega Kaban Kunsil Nengeri (ADUN) Batang Ai ngena awak nya ngungkupka pemeri RM15,000 ari Program Transformasyen Menua Pesisir (RTP) enggau Projek Mit Menua Pesisir (MRP) dikena nyaup peranak menua nya ngatur program.
"Pemeri tu mandangka perintah ransing deka meda genap menua bela ngasaika pemansang nyerumba juluk ati ngangkatka tikas pengidup rayat ba semua renggat," pia ku iya.
Bela datai Pemesai Opis Pelilih Lubok Antu Akoi Ejau, Sekretari Politik ngagai Premier Sarawak Roseline Neging, Kaban Komiti Direktor TEKUN Nasional Jampi Tutong sereta bala bukai. -EDISI UKAS
