MUKAH: Pengawa ngatur Pengerami Lau Rayak P213 Mukah sekali da mujur mandangka penegut kaul penyerakup rayat Sarawak lebuh beribu peranak pupu bansa enggau pengarap begempuru ba Maktab Rendah Sains Mara (MRSM) Mukah, kena Hari Minggu.

Sapit Menteri Pengerai ti mega Kaban Parlimen Mukah, Dato Hanifah Hajar Taib madah, nya ukai semina ngintu pengerami, tang mega nyadi pelasar beguna mekuh kaul entara pupu bansa sereta narak semangat begulai entara rayat.

“Pengerami baka tu meri awak ngagai mensia mayuh begempuru, berandau sereta bekelala enggau pangan diri, seraya negap pengelantang ti nyadi pugu peneguh Sarawak.

“Kitai deka terus nentuka program tu inklusif enggau disedia ngagai semua nadai ngira tirai juru baka ti diatur ninting taun,” ku iya lebuh dirandau pemberita pengudah pengerami nya.

Bela datai, Kaban Kunsil Nengeri (ADUN) Balingian Abdul Yakub Arbi enggau ADUN Tellian Royston Valentine ti begulai ngundang komuniti menua.

Nambah ke nya, iya meri terima kasih ngagai semua raban nyengkaum pengari rayat, agensi perintah sereta komiti komuniti genturung pendiau ti begempung ngemujur pengerami nya.

Kelimpah ari nya, iya mega ngingatka mensia mayuh semampai nyaga pengerai sepanjai musin pengerami lalu semampai ngirup ai chukup sereta nyaga pemakai dikena nyeliah sebarang risiko pengerai.

Sama datai, Residen Bagi Menua Mukah Datu Kueh Lei Poh enggau Pegawai Pelilih Mukah Peleadzman Ahip. - EDISI UKAS