KUCHING: Perintah ransing negap pengawa besikap napi gaya hari angat enggau ngemerat pengelikun sereta pengerai nembiak mit, kelebih agi ba kandang sekula enggau institusyen ruang bilik.

Menteri Pemansang Indu, Ruang Bilik enggau Komuniti, Dato Sri Nancy Shukri madah, atur malin tumu udah dikeluar nengah Opis Menteri Pelajar Malaysia, nyengkaum ngemendar nembiak ngena gari lumba ke sekula sereta diperansang mai bekal ai kediri.

Ku iya, penyadi gaya hari angat timpuh lama tu begunaka kerejasama semua, kelebih agi apai indai nentuka pengelantang anak semampai dijaga.

“Apai indai meseti ngesan pangku pengawa besai matau aktiviti anak sida ninting hari kelebih agi maya gaya hari angat tu nentuka sida berasai lantang enggau likun,” ku iya.

Iya madah munyi nya lebuh dirandau pemberita pengudah ngulu program Riang Raya Syawal Rizq Plus di Pustaka Sarawak, ditu kena Hari Minggu.

Dulu ari nya, pengawa nya mega digulu Sapit Menteri Besai ti mega Menteri Idar Kuasa enggau Transfomasyen Ai, Datuk Amar Fadillah Yusof.

Nambah ke nya, Dato Sri Nancy madah ke Opis Pengintu Pengelantang Komuniti (JKM) diatu benung besikap enggau ngerah 4,785 staf dianjung gawa ba selampur menua dikena napi sebarang penusah bekaul gaya hari angat.

“Baka ti nyadi maya penusah bah, JKM mega ngerah pengereja napi gaya hari angat, nyengkaum nyendia sukung kaunseling enggau psikologi ngagai sida ti dituntung penusah,” ku iya.

Ba pengawa nya, Bank Rakyat Pampang Matang Jaya mega nyua pemeri sepenyampau RM30,000 ngagai raban asnaf di baruh Parlimen Santubong nengah Dato Sri Nancy ti mega Kaban Parlimen dia.

Nitih ke penerang, pemeri nya deka diagih ngagai tiga konstitusyen Kunsil Nengeri (DUN) nengah Parlimen Santubong ke alai tetiap endur nerima RM10,000.-EDISI UKAS