DALAT: Inisiatif ngemunas penyeranta ba sitak Dalat chakah agi diatur nengah Woksyop Munas Penyeranta ti betuaika Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah di Kompleks Kebajikan Dalat ditu, empai lama.

Iya ti mega Kaban Kunsil Nengeri (ADUN) Dalat madah, woksyop nya ngempuru mayuh agensi enggau raban bekaul nyengkaum Opis Residen, Opis Pelilih, Opis Pemansang Nengeri (SDO), Opis Pengintu Pengelantang Mensia Mayuh, Kaunsil Mengeri Sarikei (MPS), Opis Betanam Betupi, CENTEX Dalat, Skuad Sayang, Gerempung Indai Tunggal Sarawak (PITSA), Kaunsil Pelilih Dalat enggau Mukah (MDDM), Palan Servis ADUN Dalat sereta Tuai Komuniti enggau Tuai Raban Bansa (KMKK).

Randau dipun enggau nyerenih kes di Kampung Senau Oya ti ngerikod 75 iku ba kategori seranta.

Asil serenih tetemu ke dua nama dipansut ari rintai ketegal udah midang lalu bsiti kes ditemu beserak lebuh laki enggau bini sama rejista kediri.

Kes ke bukai udah nya dibai ngagai opis bekaul ungkup pengawa bukai nyengkaum ngusung ke rumah, bejalaika intervensyen sereta nyendiaka bantu ti patut.

ADUN Dalat nya nyemetak madah, pengawa nyerenih enggau nyeraris data dipejalai taja bisi pemar enggau begunaka awak, tang bisi asil positif nentuka tetiap kes diputar manah enggau nyapai tuju.

Iya mega madah ke pengawa nyerenih ba genturung pendiau bukai di sitak Dalat deka ditandu berenggat nentuka nadai raban dikelaung ari bantu perintah.-EDISI UKAS

Gambar: FB YB Dato Sri Fatimah