MIRI: Pengerichah Taun Baru China di mengeri besai tu ukai semina richah enggau panchar tanglung enggau bejalai ngabang aja, tang mega ngayanka penegut kaul entara bala tuai enggau rayat lebuh Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chiew Yew limpang ngundang komuniti menua.

Sepanjai hari kedua enggau ketiga hari besai nya, iya ti mega Kaban Kunsil Nengeri (ADUN) Piasau ngabang ngagai 24 ruang bilik di Miri.

Pejalai ngabang nya ukai semina tradisyen aja, tang awak negut kaul dalam pengelantang enggau begulai manah diri sebala.

Ku iya, tradisyen ngabang serimbai hari besai deka terus ditan dikena ngingatka sukung rayat, kelimpah peluang tuai ngundang rayat.

“Taun Baru China ukai semina hari besai ngagai raban bansa China aja, tang awak pemadu manah negutka kaul diri sebala enggau negap penyerakup rayat pupu bansa,” ku iya lebuh dirandau.

Iya mega meri terima kasih ngagai bala kaban parti enggau bakih bukai ti meri kerejasama enggau sukung ngagai iya ngelama tu, sereta besampika semua lantang, gerai enggau kaya raja ba taun baru tu.

Ngenang pekara sama, iya madah Pengerami Nerima Pengabang Taun Baru China enggau Buka Puasa Begulai deka diatur kena 21 Februari 2026 ari pukul 5 lemai nyentuk 9 malam di Dewan Suarah Miri.

Pengerami nya nerima penatai semua rayat ari pupu bansa nyadi pelasar ngempuruka rayat dalam pengelantang enggau segulai sejalai.-EDISI UKAS