MIRI: Pengerami Ngintu Kenyalang Smart City Chinese New Year & Iftar Celebration ti diatur ba taba Kenyalang Smart City mandang semangat beserakup enggau pengelantang komuniti Sarawak ti nyelai.

Menteri Pengangkut Sarawak ti mega Kaban Kunsil Nengeri (ADUN) Senadin, Dato Sri Lee Kim Shin madah, pengerami ti ngempung dua pengerami besai iya nya Taun Baru China enggau pengawa buka puasa nyata mandangka semangat begulai ti nyadi pugu komuniti pupu bansa ba nengeri tu.

“Taun Baru China mandangka pemungkal baru, pengandal enggau pengada lalu Iftar ngingatka kitai senentang reti beterima kasih, pengeliat ati enggau begulai.

“Lebuh reti tu dipegulai, nya mandangka semangat Sarawak ti inklusif, lantang enggau semampai mansang,” ku iya.

Iya madah munyi nya ba Kenyalang Smart City Chinese New Year & Iftar Celebration ditu, empai lama.

Ku iya agi, pemansang Kenyalang Smart City ukai semina projek fizikal tang mega pengawa nempa pemansang ti meruan enggau bekualiti agi ungkup rebak dudi.

Ku iya, sesebengkah mengeri begunaka sistem penyambung enggau mobiliti ti entap nyadi pugu pemansang meruan lalu ngerandang peluang ekonomi sereta meransang pemansang mengeri.

Ku iya, Miri ti tebilang nyadi mengeri dinamik kenyau ari jeman industri minyak enggau gas diatu terus mansang nengah pemansang mengeri pintar ti ngelantang rayat.

Nambah ke nya, iya nyemetak madah ke Perintah Sarawak semampai nyukung pemansang ti dilanggur manah, bisi tanggungpengawa sereta berati ke guna komuniti timpuh panjai nyengkaum sukut mobiliti, rampa menua enggau pengelantang rayat.

Sama datai, ADUN Telang Usan, Dato Dennis Ngau, Sapit Datuk Bandar Bandaraya Miri, Ariffin Mohamad sereta temuai dipebasa bukai. -EDISI UKAS