LAWAS: Pengawa meri pengeleda pengelikun jalai ransing diatur nengah Program Meri Penemu Pengelikun Jalai serimbai Op Selamat Ke-25 Taun Baru China 2026 enggau Ramadan ti diatur ba mua SMK Lawas, empai lama.

Program diatur Indu Opis Polis Pelilih (IPD) Lawas nya ngempuru mayuh agensi penerit adat ngambi ngenatai pesan ngasi ke atur undang-undang jalai kelebih agi sepanjai musin pengerami enggau bulan Ramadan ti suah dipeda mayuh entukar.

Pengawa nya dipenyadi Kaban Parlimen Lawas, Dato Henry Sum Agong ti nyemetak madah ke pengelikun jalai nya tanggungpengawa begulai lalu begunaka kerejasama semua raban.

“Nyadi penguna jalai, kitai beempu tanggungpengawa nyaga pengelikun nyawa.

“Kerejasama rat entara rayat enggau raban bekuasa meseti ditan ke pengelantang komuniti semampai tejamin,” ku iya.

Nangkan nya, Tuai Polis Pelilih Lawas, DSP Liong Tindan madah keOp Selamat ti belabuh kena 15 Februari tu tadi enggau nyentuk diatu nadai ngerikod sebarang penusah bebadi ba pelilih nya lalu mandangka penguna semampai ngasi ke atur.

Iya mega ngelalau mensia mayuh merambu pejalai tumu agi nentuka entukar manah sereta semampai ngasi ke atur dikena nyeliah sebarang penusah enda disadang nyadi.

Ku iya, siti unit khas pengelikun jalai mega ditumbuh ngambi ransing ngatur pengawa nginau sepanjai Ramadan kelebih agi ba palan mensia mayuh enggau pintu adan menua nentuka pejalai trafik lanchar sereta nyeliah sebarang penusah enda disadang nyadi.

Entara agensi ti ngambi bagi iya nya Opis Pengangkut Darat Malaysia, Polis DiRaja Malaysia, Opis Bomba enggau Penyah Penusah Malaysia, Raban Penyangga Orang Periman Malaysia enggau Opis Volunteer Malaysia kelimpah agensi bekaul ba renggat nengeri. - EDISI UKAS