SIBU: Taun Nemuai Ke Malaysia 2026 (VM2026) dikeandal ulih nyadi penyungkak pemansang ekonomi menua kelebih agi ba Sarawak enggau Sibu nyema pengawa ngadu promosyen dipejalai semua raban begulai.

Menteri Dagang Temuai, Seni enggau Budaya Malaysia ti mega Kaban Parlimen Bintulu Dato Sri Tiong King Sing madah, kerejasama ngaul komuniti, orang dagang, agensi perintah enggau temuai beguna nentuka pemaik VM2026 ulih diasai ke serap komuniti.

“Tu mih peluang ti chukup manah meransang ekonomi lokal enggau pemansang industri dagang temuai tumbuh ngambi orang dagang, penyedia servis sereta peranak lokal ulih ngasai ke pemaik nya.

“Dikena ngemujur pekara tu, tiap iku kitai meseti ngesan pangku pengawa, segulai enggau begempung,” ku iya.

Iya madah munyi nya ba Pengerami Makai Lemai Taun Baru China diatur United Chinese Association (UCA) Sibu di Hotel Kingwood, ditu kena Hari Lima.

Dato Sri Tiong mega madah, komuniti meseti ngetan ulah profesional lalu kemerah enggau temuai seraya ngemeran pengelurus, semangat sama besaup enggau tanggungpengawa sosial dikena nyaga nama menua.

Iya mega madah ke kerejasama semua raban ulih nyagu Sibu nyadi palan dagang temuai ti dipilih lalu nempa mengeri ti seagi, lantang enggau manah agi.

Nambah ke nya, iya ti mega Kaban Kunsil Nengeri (ADUN) Dudong mega ngemerat pangku pengawa gerempung komuniti nyengkaum Gerempung China dikena negap penyerakup nengah kerejasama entara organisasyen, negap nembiak enggau indu sereta tuai ke pemansang timpuh panjai ti meruan.

Ba pengerami nya, Dato Sri Tiong mega ngemendar agih belanja sepenyampau RM100,000 ngagai UCA Sibu dikena nyukung atur program komuniti kelebih agi serimbai VM2026.

Sama datai, Sapit Menteri Pengerai Mensia Mayuh, Pengawa Berumah enggau Perintah Lokal Sarawak ti mega ADUN Pelawan Datuk Michael Tiang Ming Tee, ADUN Bukit Assek Chieng Jin Ek, Sapit Yang di-Pertua Dewan Rakyat ti mega Kaban Parlimen Lanang Alice Lau Kiong Yieng, ADUN Bawang Assan Wong Soon Koh, Sekretari Politik Premier Sarawak Joshua Ting Fu Ying, Chairman Majlis Perbandaran Sibu (MPS) Kaunselor Clarence Ting, Chairman Gerempung Klan Zhuang & Ngieng Sibu ti mega Chairman Pengatur Pengerami Ngieng Hock Teck sereta temuai bukai. - EDISI UKAS