SRI AMAN: Rayat Tanah Kenyalang dipinta terus bekunsi pekara positif bekaul Sarawak dikena nyagu nama nengeri seraya matak pengandal pemeranak puku, temuai sereta komuniti luar ngagai pengulih besai ti dikembuan nengeri tu.

Sapit Premier Sarawak, Datuk Amar Dr Sim Kui Hian madah, ba jeman media sosial enggau komunikasyen digital, rayat mangku pengawa nyadi duta nengeri nempa peragam Sarawak ba mata komuniti luar kelebih agi ari Semenanjung Malaysia.

Ku iya, pengawa bekunsi pasal pemansang infrastruktur, bantu belanja, bemacham budaya sereta inisiatif pelajar pechuma ti dipejalai Perintah Sarawak ulih meri empas terus ngagai rayat.

“Taja pia, anang kitai sengaja ngerembai pekara negatif bekaul nengeri tu ngagai orang Semenanjung nyentuk sida ngembuan peragam ti enda manah ngagai Sarawak.

“Sayau mih ke nengeri tu lalu semina ngerembai pekara ti positif aja. Lebuh nama nengeri tu gah, pemaik nya deka pulai baru ngagai rayat ba sukut pemansang ti deras agi enggau peluang ti besai agi,” ku iya.

Iya ti mega Presiden Parti Sa’ati Rayat Sarawak (SUPP) madah munyi nya ba Pengerami Ngelalu Pengabang Taun Baru China 2026 diatur SUPP Pampang Simanggang di Mini Stadium Sri Aman, kena Hari Enam.

Nambah ke nya, iya mega ngelalau rayat terus bediri teguh ba belakang Perintah Sarawak nentuka Strategi Pemansang Pengudah COVID-19 2030 (PCDS 2030) ulih dikemujur.

Ku iya, pemujur pejalai strategi nya ukai semina ngangkatka Sarawak nyadi nengeri maju manggai 2030 tang mega nentuka rayat ngasai perengkaguna pemun ti menyana agi, akses pelajar inklusif nyengkaum pelajar tinggi pechuma sereta peluang ekonomi baru ba sektor teknologi tinggi enggau kuasa gadung.

“Endang deka bisi raban ti nguji ngemuntan pengawa tu. Nya kebuah, aku ngarap rayat berundingka empas positif ti deka diasai ke rebak dudi nyema Sarawak nyapai status nengeri maju lalu enda ngaul pengawa ti ulih ngeruga penegap enggau pemansang nengeri,” ku iya nyemetak.

Sama datai, bini iya, Dato Enn Ong Siok Ean, Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis, Kaban Parlimen Serian, Dato’ Sri (Dr) Richard Riot Jaem, Kaban Kunsil Nengeri (ADUN) Batu Kitang, Dato Ir Lo Khere Chiang sereta temuai bukai. - EDISI UKAS