KUCHING: Kompleks Islam Sarawak terus ngemujur pengawa nyadi hab ekonomi enggau pemansang komuniti lebuh ngatur Majma’ Raya Fes 2026 ti nyendia 138 bansal orang dagang sepanjai Ramadan nyentuk malam Aidilfitri.

Pengawa ngatur festival nya ukai semina nambah pengerichah nyerumba Aidilfitri, tang mega nyadi penyungkak ekonomi mikro kelebih agi entara orang dagang mit enggau jelan pemesai ti bepanggai ngagai musin pengerami dikena nambah asil sereta penatai pemisi.

Pengawa nya dipenyadi Dayang Norjihan Abang Abdul Rahman Zohari, anak Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sama datai, Yang Dipertua Majlis Islam Sarawak, Datuk Misnu Taha sereta Menijar Besai Tabung Baitulmal Sarawak (TBS).

Nangkan nya, Datu Abg Mohd Shibli madah, festival nya nyendia pelasar strategik ngagai orang dagang baru enggau diatu ngelaku produk baka pekayan, kuih, aksesori Aidilfitri enggau ke bukai.

Ku iya, timbal ditu chukup manah taja besemekih enggau bazar bukai ngelingi Kuching seraya nunjukka Majma’ Raya Fes mengkang relevan enggau dipilih komuniti.

“Tu mih peluang meri peneleba ngagai orang dagang kitai sekali ke orang dagang baru tauka lama.

“Sida ngelaku produk ti diguna maya Aidilfitri lalu Alhamdulillah, timbal ti diterima chukup manah,” ku iya.

Iya madah baru, festival ti diatur ari pun Ramadan nyentuk malam Raya nya meri empas terus nambah asil enggau penguntung orang dagang seraya nyaup ngelempung tating belanja idup sereta nyungkak ekonomi ruang bilik. - EDISI UKAS

Pemberita : Ezzah Syafiqah
Gambar : Ibanez jeffery