Randau Formula Geran Khas 112D Dipelaba Sebedau Hari Raya Aidilfitri
KUCHING: Randau bekaul formula Geran Khas di baruh Perkara 112D Konstitusyen Perintah Besai nengah Aum Komiti Teknikal Sempekat Malaysia 1963 (MA63) disadang diatur enda lama da sebedau ngintu Hari Raya Aidilfitri.
Sapit Menteri ba Opis Premier Sarawak (Undang-undang, Sempekat Malaysia 1963 (MA63) enggau Kaul Nengeri-Perintah Besai) Datuk Sharifah Hasidah Sayeed Aman Ghazali madah, aum nya beguna endar dikena nerang lenak enggau ngalus ke perambu formula ti udah dibantai ngagai Perintah Besai.
“InsyaAllah, pekara deka dikerandau kitai ba aum nya berapa minggu da.
“Haribulan asal udah ditetap tang dilanjar, lalu disadang diatur bulan tu sebedau Hari Raya,” ku iya.
Iya nyebut pekara nya lebuh bejadika Bazar Ramadan Sukma Ria ti diatur nengah kerejasama Kaunsil Mengeri Kuching Utara (DBKU) enggau Emart Express Sukma Ria, kena Hari Enam.
Datuk Sharifah Haseedah nyemetak madah, naka diatu empai bisi pemutus bekaul formula ti udah dibantai ngagai Perintah Besai dikena nentuka geran di baruh Artikel 112D.
Ke penemu, Perintah Sarawak udah merambu formula meri pulai 20 peratus ari penyampau asil tauka chukai diambi ari Sarawak nentuka agih asi enggau fleksibel agi.-EDISI UKAS
