SEBAUH: Penyerakup ti nyadi tiang penegap politik enggau jamin pemujur Sarawak dudi hari terus ditegap nengah basa enggau budaya ngerami pengelain ba rayat pupu bansa di nengeri tu.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, basa enggau budaya ngerami pengelain dikemeran rayat nengeri tu patut terus ditegap dikena nyamin pengelantang timpuh panjai.

“Ngintu hari besai baka Taun Baru China ukai semina penggi siti raban bansa aja, tang nyadi pelasar ngempung rayat nadai ngira pengarap enggau tirai juru,” ku iya lebuh dirandau ba Pengerami Nerima Pengabang Taun Baru China diatur Kaban Kaunsil Direktor Sekula Chung San Sebauh, Pan Long Hui di Pasar Sebauh, malam Hari Lima.

Iya ti mega Kaban Kunsil Nengeri (ADUN) Kemena madah, rayat Sarawak ulih idup bebaik enggau likun taja bebida raban bansa enggau pengarap endang patut nyadi teladan ngagai nengeri bukai ba menua tu.

Berebak enggau nya, iya nangkan komuniti enda mudah kena ajum sentimen negatif tauka pengawa ti tau ngeruga pengelantang ke bisi.

“Penyerakup ukai dipilih, tang nentuka pemujur rebak dudi. Hari besai baka Hari Raya Aidilfitri, Taun Baru China, Gawai Dayak enggau Krismas diatu nyadi lambang rayat Sarawak segulai sejalai,” ku iya.-EDISI UKAS