KUCHING: Perintah Sarawak nurai sejarah lebuh terubah meri insentif ngagai semua atlit ti menang ari 14 nengeri nurun bepekit ba lumba ti diatur di nengeri tu taun nyin tadi.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, sebedau tu insentif perintah nengeri semina diberi ngagai atlit Sarawak ti menang sekeda main enggau lumba aja.
Ku iya, chara bebida dikena lebuh Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngemendarka insentif diberi ukai semina ngagai atlit tuai rumah aja, tang ngagai semua atlit ti menang ari 14 nengeri ti nurun bepekit.
“Tu enda kala dikereja sebedau tu. Suah agi insentif semina ngagai atlit nengeri diri empu, tang sekali tu diberi ngagai semua nengeri ti nurun bepekit,” ku iya lebuh dirandau, ditu.
Iya madah baru, inisiatif nya mandang pengeransing perintah nengeri ngamat prinsip inklusiviti baka ba strategi pemansang nengeri.
Iya nerang, konsep inklusif nya ukai semina atlit normal enggau atlit timpang pendiau bela dijaga sebaka aja, tang dikerembai ngagai atlit ari nengeri bukai.
“Insentif diberi tu sebela nitih kategori midul iya nya emas, pirak enggau engkeraju. Penyampau bela nadai ngira nengeri,” ku iya.
Iya madah, penyampau semua insentif ti diberi manggai RM399,000 ngaul atlit ari semua 14 nengeri nyengkaum Sarawak.
Ku iya, penyampau insentif diberi ngagai tetiap nengeri nitih penyampau midul emas, pirak enggau engkeraju ti diulih atlit nengeri nya.
“Nadai ngira nengeri ni, penyampau diberi sebaka. Emas berapa, perik berapa, engkeraju berapa, semua nitih penyampau ti udah ditetap,” terang iya.
Iya ngarap ke serakup enggau atlit ari nengeri bukai nemu beterima kasih ke inisiatif nya kelai sukung enggau ngaku pemujur sida.
Insentif nya mega mandangka Perintah Sarawak terus ransing negap pemansang lumba ti asi enggau inklusif seriris enggau juluk pemansang nengeri manggai 2030. - EDISI UKAS
