TATAU: Perintah Sarawak terus ransing negap pemansang menua pesisir betuai ke Premier Sarawak ti diayan nengah projek infrastruktur strategik.

Menteri ba Opis Premier Sarawak, Dato Sri John Sikie Tayai madah, asil penatai pemisi nengeri nambah ari RM6 bilion ngagai RM13 bilion taun nyin tadi ngasuh mayuh agi projek pemansang sereta inisiatif ngintu pengelantang dipejalai serap menua mungkur semua rayat.

“Pemansang ti diasai kitai diatu asil ari perambu enggau pemintar tuai ti bisi tunga kuing ti nyengala. Perintah sarawak naka ulih nentuka rayat ba menua pesisir enda dikelaung,” ku iya lebuh bejadika Jematan Rh Abon Banjar, iya nya projek RTP 2025 di baruh inisiatif eBina Baharu Jambatan kena Hari Enam.

Ku iya, sekeda projek besai mega dikemendar di baruh Mid Rajang Regional Development Agency (MiRRDA), nyengkaum nyeruri Jalai Kelebu ke Rh Ado, Lubuk Kubong beungkus RM184 juta sereta projek nyeruri Jalai Muput beungkus RM75 juta.

Kelimpah ari nya, projek jalai ari Rh Balis ke Nanga Takan dikemendar di baruh Regional Corridor Development Authority (RECODA), seraya Jalai Penyarai deka diseruri nengah Bintulu Rural Development Committee (BIRDCOM) ngena ungkus RM200 juta.

Iya nyemetak madah, kerejasama semua raban nyengkaum pengempu tanah beguna endar nentuka projek lanchar ngambi enda laun, lalu ngerumban pemansag ungkup pemaik rayat di menua ulu.

Ba pengawa sama, Kaban Parlimen Selangau, Edwin Banta lebuh bejaku madah, majak mayuh anak Selangau ngaul diri ba bidang teknikal enggau pengelandik ti diatu nyadi tiang pemansang nengeri.

Ku iya, kenyau ari 2023, lebih 500 nembiak ari Parlimen P214 Selangau ti nampung pelajar ke palan pelajar tinggi udah nerima insentif pelajar sekali beri ngaul RM800 ungkup diploma enggau RM1,200 ungkup degree, sereta lebih RM200,000 diagih ba taun 2025 aja.

“Kitai begunaka mayuh agi anak Selangau nyadi pengereja landik enggau profesional teknikal. Bidang TVET, injiniring enggau pengelandik industri diatu nyadi tiang pemun pemansang,” ku iya nyemetak.

Iya mega madah ke pelajar pengelandik ukai pilih kedua, tang pelasar beguna nempa kereja ti entap enggau ulih besemekih, nya kebuah apai indai dipinta meransang bala anak sida belajar ke bidang nya nyadi pilih lumur satu.

Dulu ari nya, Pegawai Pelilih Tatau, Calvin Ligong madah, Tuai Rumah besai pangku pengawa nentuka data profil genturung pendiau seruran dikemaru sereta nyiri Sekretari JKKK ti patut enggau bisi penemu ba IT dikena negapka atur pengawa ba rumah panjai.

Ba pengawa sama, Edwin Banta mega nyua chek MRP ngagai PIBG SK Kuala Muput sereta nyua Insentif Nampung Pelajar ngagai siku penerima kelai iya seruran nyukung pengawa negap pelajar enggau pemansang modal mensia.

Pengawa sehari nya mega digulu pengari Opis Kereja Raya Bagi Menua Bintulu, Joseph Tyran sereta Pemancha Pelilih Tatau, Pemancha Gerosen Jubin.-EDISI UKAS