SIBURAN: Sepenyampau 38 projek di baruh Program Transformasyen Menua Pesisir (RTP) ngaul agih belanja RM5 juta udah dikemendar ungkup sitak Kunsil Nengeri (DUN) Tarat, lalu nya negapka agenda pemansang menua pesisir dia.

Surat gerah ngemendar projek disua ngagai 38 penerima ti datai ari Komiti Pemansang enggau Pengelikun Genturung Pendiau (JKKK) ba sebengkah program di Tapah, Siburan ti dipenyadika Menteri Pelajar, Inovasyen enggau Pemansang Penau Sarawak Dato Sri Roland Sagah Wee Inn.

Lebuh bejaku, iya madah semua projek dikemendar nya mandangka perintah nengeri seruran naka ulih nentuka pemansang menua pesisir digaga serap, inklusif enggau meri empas terus ngagai rayat.

Ku iya, projek ti dikemendar nya mungkur pengawa ngemanah, nyeruri enggau ngaga baru perengkaguna mensia mayuh enggau infrastruktur pemun ti diguna peranak dia.

Iya ti mega Kaban Kunsil Nengeri (ADUN) Tarat madah, entara projek besai iya nya ngemanah bilik raban JKKK, balai raya enggau balai genturung pendiau ba Kampung Senah Rayang, Kampung Pesa, Kampung Gayu, Kampung Subang, Kampung Patung enggau Kampung Simpok.

Kelimpah ari nya, projek ngaga baru stor kebun di Kampung Chupak, langkau berapi di Kampung Stabut, balai di Kampung Plaman Toop (Renggat 2) sereta rumah temuai di Kampung Stabut.

Bela dikemendar projek nyeruri mesejit, tanah pendam, taman rekreasyen, padang bol, sistem parit sereta jalai genturung pendiau ba Kampung Darul Islam Belimbing, Kampung Pesang, Kampung Rudan, Kampung Sinjok, Kampung Plaman Payang enggau Kampung Baru Mawang.

Pejalai 38 projek nya disadang meri mayuh pemaik ngagai semua komuniti dia, lalu ngedut seraka pemansang mengeri enggau menua pesisir di DUN Tarat. - EDISI UKAS