MIRI: Pengulih besai ti apin diserungkai ba komuniti asal, kelebih agi indu Orang Ulu, patut diberi perati enggau dikemansang strategik agi nentuka pengulih nya ulih nyaup pemansang ekonomi kreatif Sarawak.

Presiden The Rotary Club of Miri Oil Town, Dr Pauline Sagau madah, komuniti asal di Sarawak ngembuan penau, kreativiti sereta teguh, tang agi begunaka nalan enggau sukung ngambi ulih ngayanka diri ba renggat besai agi.

“Sida ngembuan penau nambah projek komuniti asal, negap identiti raban bansa, enggau gawa ke pemansang ekonomi kreatif Sarawak," ku iya.

Iya nibar ke jaku nya ba mua mayuh rambau Majlis Sarawak Ethnic Contemporary Design Showcase Dinner 2026 dipenyadika Sapit Menteri Dagang Temuai, Seni enggau Budaya Chiew Choon Man ditu, Hari Enam.

Dr Pauline madah, indu Orang Ulu ngaul diri ba bidang nengkebang langkar etnik kontemporari, seni dero enggau ngaga produk inovatif baka ari daun berunai mandangka aktiviti ti sebedau tu dipeda dagang mit ulih dikerembai nyadi industri besai empas.

Ku iya, pengulih nya ulih nyadi pemansut ekonomi meruan ngagai komuniti enti sema diseridi enggai ditegap nengah latih, akses makit enggau rentayan kerejasama.

Nya alai ku iya, pengawa begulai keterubah entara The Rotary Club of Miri Oil Town enggau Serakup Indu Orang Ulu Miri diperati pengawa ti engkeman endar ngerandang peluang besai agi ngagai asil seni enggau langkar tengkebang etnik lokal. -EDISI UKAS