KAPIT: Projek Jalai Melekun ke SK Nanga Kebiau, Sut (Renggat 1) ti beungkus RM83 juta deka digaga dikena ngemuntangka pejalai seraya nyungkak pemansang sosioekonomi rayat menua nya.

Kaban Kunsil Nengeri (ADUN) Pelagus Wilson Nyabong Ijang madah, Opis Menteri Pemansang Genturung enggau Kandang Menua (KKDW) udah besetuju ngaga projek nya dalam timpuh 156 minggu.

“Projek Jalai Melekun ke SK Nanga Kebiau, Sut (Renggat 1) beungkus RM83 juta lalu timpuh ngaga kandang 156 minggu disadang mai pemaik bekaul sistem jalai ti bela deka nyungkak tikas sosioekonomi peranak menua nya,” ku iya.

Iya madah munyi nya maya bejaku ba Program Tuai Begulai Enggau Rayat ba Rumah Kaya, Nanga Luba, Sut, Hari Minggu tu tadi.

Maya nya mega, Wilson bisi ngungkup RM24,000 belanja ngagai Komiti Pemansang enggau Pengelikun Genturung Pendiau (JKKK) Rumah Kaya enggau RM3,000 agi ungkup Biro Indu JKKK Rumah Kaya.

Kelimpah ari nya, enam Biro Indu ke bela datai nerima RM3,000 tiap gerempung, lalu tiap 19 rumah panjai ba kandang menua Sut nerima RM5,000.-EDISI UKAS