KUCHING: Kompeni teknologi, OpenMove AI bisi pengingin deka nanggam kerejasama strategik begulai enggau agensi di Sarawak dikena nyaup agenda transformasyen ti benung dipejalai perintah nengeri.

Chairman kompeni nya, Tengku Tan Sri Dato Mohamad Rizam Tengku Abdul Aziz madah, tuju penemuai basa ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg dikena berandauka langkar kerejasama ke ulih digaga begulai enggau agensi perintah nengeri Sarawak, lebih agi nyendiaka servis pakar bekaul agenda transformasyen.

"Randau tadi manah amat lalu kami bela nerima sanding penemu ari Premier minta randau silik diatur begulai enggau agensi bekaul.

"Nyangka kami bekerejasama enggau agensi perintah nengeri Sarawak nyau ngemujurka agenda transformasyen sida," ku iya.

Iya madah munyi nya maya aum media pengudah ngatur penemuai basa ngagai Premier Sarawak di Kompleks Satria Pertiwi, Petra Jaya, Hari Dua.

Nambah ke jaku iya, Tengku Tan Sri Dato Mohamad Rizam madah, OpenMove AI bisi ati nempa kerejasama strategik laban Perintah Sarawak dulu bejalaika agenda transformasyen digital bepelasarka macham inisiatif enggau pengawa ti udah digaga.

Ku iya, sida sedia nyendiaka pengelandik ba sekeda pekara bekaul transformasyen nengah chara bepelasarka pengelandik enggau asil pengawa nembiak menua tu ti nyadi pengelebih ba kerejasama ke deka diserungkai.

Sama datai, Mandal Presiden Kanan Movenet (Malaysia) Sdn Bhd Steven Lim Kee Seng, raban Mandal Presiden Movenet (Malaysia) Sdn Bhd Dr Ts Muhammad Fadhli Abdul Malek enggau S. Chandra Bogar Samuel Swaniadian. -EDISI UKAS

Pemberita: Ahmad Daniel Faiz
Gambar: Hazrin Sunaini