KUCHING: Kaunsil Pemansang enggau Pengintu Tanah (LCDA) majak ngenegap pengeransing ba pemansang inklusif sereta ngintu pengelantang rayat nengah Program Iftar LCDA Darul Hana 2026 ti diatur, ditu, Hari Dua.

Program diatur nyerumba Pengawa Ngintu Genap Taun Ke-45 LCDA ti berambaika jaku “45 Tahun LCDA Begulai Enggau Komuniti” dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Nitih ku LCDA, pengawa ngatur program tu ukai semina pengawa ninting taun, tang pelasar dikena masa sinergi entara agensi perintah, tuai genturung pendiau enggau raban media ti udah nyaup pejalai agensi nya empat puluh taun ke udah.

Program Tanggungpengawa Rama Korporat (CSR) tu nyadi kelai nyengala nempa arus pemansang nengah Projek Pemansang Darul Hana alai pengawa ngintu pengelantang raban begunaka bantu tetap dikemerat ba agenda pemansang Perintah Sarawak.

Batang program mandangka Menijar Besai LCDA, Datu Sr Zaidi Mahdi nyuaka Zakat Dagang 2025 sepenyampau RM1,782,437.05 ngagai Tabung Baitulmal Sarawak (TBS) ti diari Menijar Besai TBS, Datu Abang Mohd. Shibli Abang Mohd Nailie.

Kelimpah nyua zakat, Premier Sarawak mega maya nya bisi meri pemeri Hari Raya sepenyampau RM25,000 ngagai 125 penerima ari 13 buah genturung pendiau ari Projek Pemansang Darul Hana.

Pemeri nya dikena nyaup sida nyerumba Aidilfitri ti deka datai.

Bisi 700 bala mayuh ngulu program nya ke bela digulu Sapit Premier Sarawak, Datuk Amar Douglas Uggah Embas, Chairman LCDA Holdings Sdn Bhd, Tan Sri Datuk Amar Dr. Abdul Aziz Dato Husain sereta raban Sapit Menteri enggau raban tuai opis perintah. - EDISI UKAS


Pemberita: Ezzah Syafiqah
Gambar : George