KUCHING: Sektor pelajar enggau nyaga tumu nembiak mit (ECCE) di Sarawak patut ngaga ubah strategik nyerumba penumbuh polisi baru ti ngulihka nembiak mit umur enam taun tama Primari Satu berengkah 2027.

Menteri Pemansang Indu, Nembiak Mit enggau Pengelantang Komuniti Sarawak ti mega Chairperson Kaunsil Pemansang Tumu Nembiak Mit Sarawak (MPAKS), Dato Sri Fatimah Abdullah madah, polisi ti ditumbuh Opis Menteri Pelajar Malaysia (KPM) nya ngulih ke apai indai milih baikka ngerijsta anak sida tama Primari Satu maya umur enam taun tauka terus ba tadika nyentuk beumur tujuh taun.

Ku iya, taja polisi nya enda mandatori, tang ekosistem TASKA enggau TADIKA ba nengeri tu deka signifikan, lebih agi ngaul penyampau nembiak tama, pemeruan belanja orang dagang sereta nyikap pemansang penau nembiak mit.

“Enti mayuh apai indai milih nganjung anak ngagai Primari Satu tumu agi, nembiak enam taun ba tadika dipelaba nyengala kurang agi, lalu pengawa ba tadika sereta ungkup guna pengajar mega deka bekurang,” ku iya ba aum media pengudah Aum MPAKS ditu, Hari Dua.

Nambah ke jaku iya, iya madah, penyampau nembiak ke bekurang ukai semina ngeruga penatai pemisi orang dagang, tang pengawa puang pengajar prasekula mega deka majak kurang.

Iya mega madah, mayuh apai indai maya tu agi ngasai ke nembiak beumur nyentuk empat taun dipasuk ba TASKA lalu umur empat ngagai enam tahun ba TADIKA, ketegal pengirau ke tikas akademik enggau runding nembiak mit.

Berindik ari nya, MPAKS nisih langgur ngempung lesen ti ngulihka TASKA enggau TADIKA bejalai ke pengawa ba premis ti sama lalu perengka guna dikunsi baka dapur, alai bemain ba luar sereta opis, nitih ke guna bilik enggau zon nitih umur.

Iya madah, chara nya ulih ngurangka ungkus pengawa, ngenegap nembiak mit belajar sereta ngemuntang kerejasama entara pengajar enti bisi isu bekaul pemansang fizikal, emosi tauka rama.

Iya madah opis menteri begulai enggau MPAKS deka nentuka Sarawak besikap napi ubah polisi nya. –EDISI UKAS