UKAS Nerima Penemuai Basa BERNAMA Sarawak, Negap Sinergi Strategik Media
KUCHING: Unit Komunikasi Awam Sarawak (UKAS) nerima penemuai basa ari Pertubuhan Berita Nasional Malaysia (BERNAMA) Sarawak di Indu Opis UKAS, Begunan Baitul Makmur 1, ditu, Hari Tiga
Penemuai basa nya besai reti dikena ngenegap sinergi strategik entara kededua agensi media nya.
Direktor UKAS, Awang Putrayusrie Awang Redzuan ngelaluka penatai raban BERNAMA Sarawak ti betuaika Tuai Biro BERNAMA Sarawak, Muhammad Ammar Shafiq Hamzah.
Bela nyempulang iya, Pegawai Berita, Rozlin Rusharmeen Rosmi, Anasathia Jenis enggau Zaphne Philip.
Penemuai basa nya nyadi pelasar ngerapit kaul professional kelimpah berandauka pengulih kerejasama ba pekara nyeraris berita enggau ngenatai penerang ti komprehensif agi ngagai rayat.
Nengah penemuai basa nya mega, kededua bela madahka pengeransing ngenegap kaul komunikasyen sereta nambah sinergi media dikena nentuka pengawa ngenatai penerang ti betul sereta mai pemaik ngagai rayat Sarawak.
Sama datai Sapit Direktor UKAS, Mohamed Faizal Shah Ali enggau raban pegawai kanan UKAS.-EDISI UKAS
