PULAU BRUIT: Bisi tujuh projek Program Transformasyen Menua Pesisir (RTP) beungkus semak RM2 juta ba sitak Kunsil Nengeri (DUN) Semop dipatau rat dikena nentuka projek nya mujur digaga sereta nitih langgur ke ditetap.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol maya ngabas pemansang projek nya madah, pengawa matau beguna dikena nyamin semua inisiatif meri pemaik terus ngagai rayat menua pesisir.

“Sebagi ari projek tu iya nya, pengawa nyeleti sereta ngadu jalai, balai komuniti sereta masjid,” ku iya maya dirandau media.

Datuk Abdullah ti mega Kaban Kunsil Nengeri (ADUN) Semop madah, penemuai gawa dua hari nya bela disempulang agensi bukai baka Opis Kereja Raya (JKR), Opis Entali Ai enggau Parit (DID) sereta pelatih Sarawak Centre of Performance Excellence (SCOPE).

Kelimpah projek RTP, iya madah, lebih 20 projek perengka guna mensia mayuh nengah skim belanja Agensi Pemansang Delta Rajang (RADDA) enggau Projek Khas Rayat enggau ungkus semua urung RM95 juta benung sereta deka digaga ba sitak nya.

“Aku ngari ke peranak N42 Semop beterima kasih ke saup ari semua agensi perintah ba renggat pelilih enggau bagi menua. Enti nadai kerejasama sida, nyangka bisi pedis pengari rayat ngamatka juluk ati rayat, lebih agi ba kandang menua pesisir,” ku iya baru.

Ku iya, pemujur pemansang menua pesisir ba DUN Semop bepanggai enggau kerejasama rat entara pengari rayat, opis palan servis, agensi pengatur, opis kaunsil pelilih menua sereta tuai menua nyengkaum tuai genturung pendiau enggau tuai rumah.

Iya mega madah, pengawa terus ngabas menua beguna dikena nentuka projek RTP digaga nitih langgur sereta nipak guna rayat.

“Taja pia, sekeda pekara udah ditentu nyadi kebuah projek laun, ngasuh sekeda projek ke patut tembu nitih langgur napi pengelaun sereta ngeruga pemujur semua program.

“Tu nyengkaum ketegal gaya hari, ujan enggau penusah ampuh bah," ku iya nerang.-EDISI UKAS