SIBU: Penusah begunan runtuh ba Jalai Pahlawan apin lama ti udah deka dikategori nyadi penusah ngenyit lalu diputar nengah Komiti Pengatur Penusah Ngenyit Nengeri (JPBN).

Sapit Premier Sarawak, Datuk Amar Profesor Dr Sim Kui Hian madah, pemutus nya digaga Kabinet nangkan nerima penerang ari Sapit Menteri Pengerai Mensia Mayuh, Pengawa Berumah enggau Perintah Lokal, Datuk Michael Tiang Ming Tee.

“Penusah tu dikategori penusah ngenyit laban nadai sapa nyangka pekara tu nyadi, lalu iya tau nyadi enda ngira dini.

“Pekara tu tau nyadi enda ngira dini tanah kerapa, ukai semina ba dia aja," ku iya madah ngagai pemberita maya ngabas palan penusah nya, Hari Lima.

Ku iya nerang, taja JPBN ngatur pengawa ba renggat nengeri, JPBN Bagi Menua Sibu ti betuai ke Residen Bagi Menua Sibu deka nyeraris atur sereta nisih ba renggat menua.

Kabinet mega besetuju nyiri pakar bekaul dikena nentu ketegal ke bendar struktur begunan nya runtuh.

“Kitai begunaka pakar ngambi nemu utai ke nyadi laban pekara tu tau ngasuh pekara besai agi nyadi.

“Pekara tu ukai semina bekaul penusah tu aja, (pemutus nisih) deka mantu kitai meda utai ke ulih digaga," ku iya baru.

Kelimpah isu begunan runtuh, Menteri Pengerai Mensia Mayuh, Pengawa Berumah enggau Perintah Lokal nya mega madah projek Pemansang Baru Bukit Assek dikena mutar timpuh panjai bekaul penusah tanah enggau ai ba Sibu.

Ku iya, Raban Bekuasa Perambu Nengeri Nengeri (SPA) udah mutuska pelin besai ungkup kandang mesaj 815 ekar nya, ke diatu diatur Opis Pemansang enggau Pengintu Tanah (LCDA).

“Premier endang beamat-amat. Iya udah mayar RM30 juta ungkup yuran konsultan ngagai siti firma antarabansa, Ramboll ari Denmark. Enti kami enda beamat, kapa kami mayar RM30 juta?” ku iya.

Nambah ke jaku iya, iya madah, projek nya ngaul belanja siling sepenyampau RM500 juta dikena ngempu tanah nengah Langgur Pemansang Malaysia Lumpar Ke-12 (RMK12) dikena meli baru rumah ke majak jai ba kandang endur nya.

“Pengudah ngempu tanah, kitai deka ngengkah kategori baru kandang endur ni ti engkeman alai ngaga enggau ke enda, laban tu kandang tanah kerapa tebesai ditu," ku iya.

Ku iya, pengeran nagang penusah bah ba Sibu begunaka kerejasama perintah nengeri enggau Perintah Besai.

Nya alai, iya meransang Kaban Parlimen (MP) menua ngambi bejalai ke tanggungpengawa sida ngulihka belanja ari Kuala Lumpur, seraya nyebut RM2.4 bilion mujur diulih Sapit Menteri Besai, Datuk Amar Fadillah Yusof ungkup projek nagang bah di Kuching.

“Kaban Parlimen kitai mega patut bejalaika pengawa. Pengawa nagang bah kompleks lalu semina pakar ulih mutar," ku iya seraya nambah ke jaku madah perintah nengeri diatu nganti Premier Sarawak ngelanchar pelin besai Sibu. - EDISI UKAS