KANOWIT: Semua Tuai Raban Bansa enggau Tuai Komuniti (KMKK) dipinta mereti, bebasa sereta nerima pemutus pengawa nyiri ti udah ditetap nentuka pengelantang komuniti ba renggat baruh terus dijaga.

Kaban Kunsil Nengeri (ADUN) Ngemah, Anyi Jana madah, pengawa milih KMKK dipejalai berurun nengah perambu komuniti sebedau diputus Panel Milih ti betuai ke Residen Bagi Menua.

Ku iya, pengawa nyua setipikit dichiri ukai semina lambang ngaku tang ngelempai pangku pengawa ngemudi komuniti sereta nyadi jematan entara perintah enggau rayat.

“Pengawa nyua setipikit kelai perintah enggau komuniti andal enggau pechaya ke iring KMKK ngesan tanggungpengawa nyaga pengelantang komuniti lokal,” ku iya ba Pengawa Nyua Setipikit KMKK DUN Ngemah 2026, Hari Empat.

Iya nyemetak madah ke kaul rat entara KMKK enggau komuniti meseti terus ditegap nengah kerejasama begulai administrasyen pelilih, tuai opis perintah sereta pengari rayat nentuka pengawa ngenatai servis ngagai rayat lanchar.

Nambah ke nya, Anyi mega minta atur program komuniti sepanjai taun 2026 ditambah nipak peminta rayat kemaya hari kelebih agi ba sukut pemansang sosial enggau ekonomi menua pesisir.

Ku iya, KMKK mangku pengawa strategik ngemujur mayuh inisiatif Perintah Sarawak ngagai komuniti nyengkaum ngaul bidang pelajar, pengelantang, pengerai, pengawa berumah, pemansang infrastruktur sereta isu Tanah Adat Bansa Asal (NCR).

“KMKK nya raban gawa ba luan nentuka polisi enggau bantu perintah amat datai ngagai rayat.

“Nya kebuah, genap tuai komuniti meseti ngesan tanggungpengawa enggau manah sereta bisi integriti,” ku iya.

Iya mega nyemetak madah ke pemesai guna ngena Palan Servis Pengari Rayat nyadi pelasar rasmi mutar isu enggau peminta komuniti chara berurun enggau nemban agi.

Ngenang pemansang politik diatu, Anyi madah ke taun 2026 disadang Pengawa Bepilih Besai Nengeri Ke-13 (PRN-13) Sarawak lalu komuniti dilalau terus ngetan penyerakup sereta enda mudah kena ajum ti ulih ngeruga pengelantang komuniti.

Pengawa nya mega digulu Pegawai Pelilih Kanowit Cerisologo Sabut, Sekretari Politik Menteri Penyerakup Bansa, Dr Stephen William, Sekretari Politik Premier Sarawak Susan Clement, Pegawai Unit Komunikasi Awam Sarawak (UKAS) Bagi Menua Sibu Jelani Ajang sereta tuai komuniti nyengkaum Pemancha Charlie Salang enggau Pemancha Leong Khing Hee.- EDISI UKAS