SERIAN: Sarawak majak mansang ba sekeda sektor besai nyengkaum ekonomi enggau digital, berekat rayat nengeri tu nerima ubah ti dibai Perintah Sarawak.
Bechunto ke pemansang digital, Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn madah ke rayat Sarawak diatu majak pintar teknologi nengah pengawa ngena telefon pintar, bebayar chara digital baka Sarawak Pay (Spay) enggau kod QR nyengkaum ba genturung pendiau.
“Pekara tu mandangka pemansang Sarawak nuju kandang menua ti moden enggau besemekih agi.
Iya madah munyi nya ba Pengerami Makai Lemai Taun Baru China 2026, ditu kena Hari Lima.
Ku Kaban Kunsil Nengeri (ADUN) Tarat nya baru, pelajar ba bidang Sains, Teknologi, Injiniring enggau Matematik (STEM) kelebih agi ba bidang aeroangkasa, elektrik enggau elektronik mega nerima timbal ti chukup manah ari rebak biak.
“Kitai deka bala anak belajar tinggi nyentuk nampung pelajar ba universiti di Sarawak enggau belajar bidang aeroangkasa.
“Satelit diatu ukai agi besai enggau mar, bisi ti mit, mudah agi enggau jampat dikemansang. Tu mih pemansang dudi hari kitai,” ku iya.
Inisiatif nya, ku iya, nunjukka polisi perintah Gabungan Parti Sarawak (GPS) ti meri perati ngagai semua rayat nadai ngira raban bansa enggau pengarap kelebih agi ngagai rayat Sarawak ti ngembuan MyKad status ‘K’.
Bela datai, Residen Bagi Menua Serian Caroline Cleophas Joseph, Sekretari Politik Premier Sarawak Damen Rejek, Pegawai Pelilih Serian Enting Nyami, Chairman Kaunsil Pelilih Serian Dato Peter Minos, tuai opis sereta temuai dipebasa bukai. - EDISI UKAS
