SERIAN : Program Scout Fun Run 1.0 diatur Sekula Primari (SK) Parun Suan mujur ngempuru urung 250 penyereta enggau richah ba Kampung Jenan, lalu ngerapit kaul entara institusyen pelajar enggau komuniti lokal.

Tuju program nya dikena ngumpul belanja Gerempung Apai Indai enggau Pengajar (PIBG) sekula nya udah dipenyadi Kaban Kunsil Nengeri (ADUN) Tebedu, Dr. Simon Sinang Bada ti mega meri sukung ngagai pengawa negap pemansang pelajar menua pesisir.

Iya mega nyemetak madah ke pelajar nya kunchi nyamin pengidup rebak biak ngambi besemekih agi sereta ulih ngemujur pemansang nengeri enggau menua.

Ku iya, akses ngagai pelajar enggau pengelandik ti bekualiti ulih nyendia peluang pengidup ti menyana agi dibanding sida ti nadai pemun pelajar ti tegap.

Iya mega meri terima kasih ngagai raban pengatur sereta pengajar SK Parun Suan ti mujur nempa nembiak nyulut nyentuk mujur nampung pelajar ngagai Yayasan International School, seraya nunjukka pengulih besai sekula menua pesisir nempa modal mensia bekualiti.

Kelai nyukung inisiatif raban sekula enggau PIBG, iya ngemendar agih belanja sepenyampau RM10,000 dikena nyaup ngemujur aktiviti sereta program pemansang SK Parun Suan dudi hari.

Program belanda nya ukai semina nyapai tuju ngumpul belanja tang mega mujur narak gaya idup bepengerai sereta mekuh semangat beserakup enggau kerejasama entara nembiak, pengajar sereta komuniti lokal.

Sama datai, Kepala Pengajar SK Parun Suan, Nebin anak Nasa; Yang Dipertua PIBG, Jerry Mabui; Pemancha Jacques Kantuh; Penghulu Ginui Pupur sereta Tuai Raban Bansa Limai Ranyid enggau Dikos Suntek.

Program ngaul komuniti baka tu dipeda nipak inisiatif pemansang pelajar nengah kerejasama semua komuniti. - EDISI UKAS