UTS, ASAUB Nyain MoU, Nanggam Kerejasama Akademik & Pansik
SIBU: Universiti Teknologi Sarawak (UTS) nanggam Sempekat Pemereti Ati (MoU) enggau Universiti ASA Bangladesh (ASAUB) dikena ngerandang kerejasama ba bidang akademik, pansik enggau besilih nembiak.
Mandal Chanselor UTS Profesor Datuk Dr Khairuddin Abdul Hamid madah, inisiatif nya seraris enggau juluk ngubah pelajar tinggi sereta nyagu institusyen ba renggat global.
“Kerejasama tu nyerangkung pansik begulai, akademik, besilih nembiak enggau pengelicha sereta pemansang program akademik enggau inovasyen ti meri pemaik ngagai kededua institusyen,” ku iya ba pengawa nanggam kerejasama nya kena Hari Lima.
Ku iya, UTS ti diatu udah datai ba taun ke-13 ditumbuh nempa pemansang nyengala enggau penyampau nembiak nambah ari urung 1,000 iku keterubah dibuka ngagai 6,500 nembiak naka diatu.
Pia mega, UTS ngemerat pengawa nambah kualiti pengajar akademik nyengkaum nambah penyampau profesor enggau profesor madya sereta ngambi pakar ari menua luar.
“UTS nyelinting abis nadai 10 peratus ari semua nembiak prasiswazah nya ari nembiak antarabansa manggai 2030,” terang iya.
Kerejasama nya disadang ngerandang mayuh agi peluang kolaborasyen ti meri pemaik ngagai kededua institusyen sereta nyungkak pemansang pelajar tinggi ti besemekih.
Sama datai iya nya Mandal Chanselor ASAUB Profesor Dr. S. M Rezaul Karim, Sapit Mandal Chanselor (Akademik) UTS Profesor Dr. Mohd Shahril Osman, Pengerejister UTS Jimmy De Rozario @ Abdul Rahman, Dekan Fakulti Dagang enggau Atur Pengawa UTS Profesor Dr Winnie Wong Poh Ming, Dekan Fakulti Alam Bina UTS Profesor Madya Dr Dayang Siti Hazimmah Ali, Dekan Pusat Pengajian Asasi UTS Kong Sieng Huat, Direktor Pusat Penerbitan UTS Profesor Madya Dr Muhammad Firdaus Abong Abdullah enggau Direktor Palan Rentayan Antarabansa UTS Dr Gary Loh Chee Wyai. -EDISI UKAS
