SPAOH: Pemansang Sarawak sehari tu asil penyerakup rat rayat pupu bansa ti semampai bekerejasama sereta bela bebasa ke pangan diri.

Sapit Premier Sarawak Datuk Amar Douglas Uggah Embas madah, pengerami ti dirami begulai nyadi penyungkak penyerakup.

“Semangat begulai ti dikemeran kelebih agi maya ngintu pengerami baka Taun Baru China, Hari Raya Aidilfitri enggau Gawai Dayak nyadi pugu penegap enggau pemansang nengeri,” ku iya ba Pengerami Ngabang Gong Xi Fa Chai Taun 2026 Renggat Pelilih Mit Spaoh diatur Gerempung Tiong Hua Spaoh di Balai Komuniti Spaoh kena Hari Lima.

Menteri Infrastruktur enggau Pemansang Palan Penyangkai Kapal Sarawak nya madah, bisi sekeda projek pemansang ti benung enggau deka dipejalai ba endur nya nyengkaum ngaga jematan, pemansang infrastruktur, projek berumah sereta pengawa nyungkak sektor betanam betupi enggau dagang.

Ku iya agi, projek Jematan Batang Lupar 2 ti deka tembu disadang ngemandak taga pejalai ari Sri Aman ke Betong enggau Spaoh seraya ngeranchak pemansang ekonomi lokal.

Ba pengerami nya, Kaban Kunsil Nengeri (ADUN) Bukit Saban nya mega ngemendar sekeda agih belanja iya nya RM50,000 ngagai Gerempung Tiong Hua Spaoh ti nyadi komiti pengatur, RM20,000 ngagai Kaunsil Pengatur SJKC Chung Hua Spaoh, RM20,000 ngagai PIBG SJKC Chung Hua Spaoh, RM50,000 ngagai Tepikong China Spaoh sereta RM100,000 ungkup projek ngaga Pendam China Spaoh.

Nangkan nya, Kaban Parlimen Betong Richard Rapu mega ngagihka belanja penyampau RM35,000 ngagai lima NGO komuniti China Spaoh iya nya The Saribas Spaoh Tiong Hua Association (RM10,000), Spaoh Chinese Temple Charitable Trust Board (RM5,000), Gerempung Tiong Hua Spaoh (RM5,000), Kaunsil Pengatur Sekula SJKC Chung Hua Spaoh (RM10,000) sereta Kelab Pengelantang enggau Rekreasyen Staf SJKC Chung Hua Spaoh (RM5,000). -EDISI UKAS