KUCHING: Opis Menteri Pemansang Indu, Ruang Bilik enggau Komuniti (KPWKM) benung matau rat kes siku nembiak mit indu didawa diempalung apai iya ti dipechaya makai dadah ke dalam parit.

Menteri Pemansang Indu, Ruang Bilik enggau Komuniti, Dato Sri Nancy Shukri madah, pegawai penyaga Opis Pengelantang Komuniti (JKM) udah ngabas nembiak mit ti benung diperubat ba hospital.

Ku iya, kes nya deka dibai ke kort Hari Satu tu ngambi netapka palan pengentap enggau pengawa nyaga nembiak mit nya sementara.

“Kes tu deka dipechara ba kort Hari Satu tu lalu kitai deka ngulihka pemutus silik ari kort. Nitih ke penerang, apai indai nembiak mit nya agi ngadu surat sarak.

“Kort deka ngaga pemutus sementara bekaul pengawa nyaga nembiak mit nya nyengkaum nentuka raban ti pemadu engkeman ngibun tudah,” ku iya.

Iya madah munyi nya lebuh dirandau pengudah Program Ramadan Prihatin di Majlis Darul Hana, Markas Pasukan Polis Marin Wilayah Lima Sarawak di Bintawa, Hari Enam.

Dato Sri Nancy ti mega Kaban Parlimen Santubong madah, nyema nadai raban ti engkeman dikelala, tudah enggau bala menyadi iya ulih dianjung enggau diibun JKM.

Taja pia, iya andal ke agi bisi bala ti ulih nyaup ngibun anak nya.

Dulu ari nya, penusah nya nyadi kena pagi Hari Tiga ba luar rumah.

Nembiak mit beumur enam taun nya bakal ba mata enggau pah.

Indai tudah udah ngaga ripot polis ba hari ti sama.

Saspek beumur 43 taun nya udah ditan hari siti lalu lebuh diperesa ai kemi tetemu ke iya positif dadah bansa amphetamine enggau methamphetamine.

Kes dipansik nengah Seksyen 31(1)(a) Akta Kanak-Kanak 2001, enggau pansik polis agi dipejalai. - EDISI UKAS