Direktor UKAS, Awang Putrayusrie Awang Redzuan madah, agensi nengah Opis Premier Sarawak nya ukai semina ngerembai penerang rasmi tang mega nyadi pelasar komunikasyen ngambi mending penemu rayat.

Ku iya, Perintah Sarawak nengah iring Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mengkang nyungkak agenda pemansang ti nyerangkung ekonomi gadung, transfomasyen digital, pemansang infrastruktur menua pesisir, pengelantang rayat sereta nyendia peluang gawa kelebih agi ngagai raban nembiak.

“Taja pia, semua tu begunaka sukung enggau kerejasama ari komuniti.

“Nya kebuah, program sehari tu beguna endar dikena ngaul komuniti, nerang ke kuing tuju Perintah sarawak lalu mendingka penemu rayat,” ku iya.

Iya madah munyi nya nengah teks jaku ti dibacha Sapit Direktor UKAS, Joachim Paggang Jabong serimbai program UKAS Begulai Enggau Komuniti Pengerami Ngintu Taun Baru China Kunsil Nengeri (DUN) Mambong, ditu kena Hari Enam.

Nambah ke nya, Awang Putrayusrie mega nyemetak madah ke UKAS semampai bekerejasama enggau sebarang agensi perintah, organisasyen tauka gerempung ukai dikuasa perintah (NGO) nentuka penerang ti betul bekaul inisiatif perintah ulih majak dikerembai.

Ku iya, nengah program baka nya, UKAS naka ulih ngedut takah entara perintah, tuai lokal enggau rayat nengah komunikasyen.

Iya ngarap program begulai enggau komuniti nya ulih meri pemaik kelebih agi ngagai raban nembiak seraya nambah ke pemereti sida ngagai polisi sereta kuing tuju pemansang nengeri. - EDISI UKAS

Pemberita : Jonnie Kiew

Gambar : Ibanez & George